काठमाडाैं, फागुन ३०

मैयुङ–हाँस पोखरी महोत्सब २०७४ को आर्थिक सहयोग तथा प्रचार प्रसार गर्ने उदेश्यका साथ आज राजधानीमा बृत्तचित्र प्रदर्शन तथा अन्तरक्रिया कार्यक्रमको आयोजना गरिएको छ ।

तिम्मा सरोकार समाज काठमाडाैंको आयोजनामा भएको उक्त कार्यक्रममा भोजपुर तथा खोटाङ जिल्लाका राजनीतिक तथा सामाजिक क्षेत्रका ब्यक्ति ब्यक्तित्वहरु साथै सांसद तथा पुर्ब मन्त्रिहरुको उपस्थिति रहेको थियो ।

भोजपुर तथा खोटाङ जिल्लाको सिमा क्षेत्रमा रहेको सुन्दर पर्यटकीयस्थल मैयुङ डाँडाको प्रचार–प्रसार गरी पर्यटन ब्यबसायको प्रवर्द्दन गर्ने उदेश्यका साथ तिम्मा सरोकार समाजले आगामी २०७४ सालको बैशाख १, देखि ३ गतेसम्म तीन दिने मैयुङ–हाँस पोखरी महोत्सब २०७४ आयोजना गरेको हाे ।

आजको कार्यक्रममा भोजपुरे गायक श्याम सामसोङ राईद्दवारा निर्देशित भोजपुर जिल्लाको बिभिन्न पर्यटकीय स्थलहरुको बिभिन्न ऋतुहरुको सुन्दर दृश्यहरु कैद गरिएको ऋतुहरुमा भोजपुर नामक बृत्तचित्र प्रदर्शन गरिएको थियाे ।

जम्मा ५० मिनेटको उक्त बृत्तचित्रलाई नै आधार बनाएर त्यसै बिषयमा अन्तर क्रिया कार्यक्रम पनि गरिएको थियो । अन्तरक्रियामा बिभिन्न पर्यटन तथा होटल ब्यबसायमा लागेको ब्यक्तिहरुको पनि बाक्लो उपस्थिति रहेको थियो ।

उनीहरुले यस क्षेत्रमा बिभिन्न प्रकारका पर्यटनको सम्भाबना रहेको साथै यस महोत्सबले त्यसको लागि माहोल तयार गरेको बताएका थिए । मैयुङ–हाँस पोखरी महोत्सबमा बिभिन्न कार्यक्रमहरु पनि घाेषणा गरिएकाे छ ।

जसमध्ये दाँवाली मिलन क्लबको सह आयोजनामा भोजपुर बजार देखि मैयुङ डाँडासम्म अल्ट्रा म्याराथुनको लागि पहल गर्ने बताइएकाे छ ।

भिडियाे हेर्नुहाेस्

प्रकाशित मिति: ३० फाल्गुन २०७३, सोमबार