बहादुरसिंह लामा भन्छन्–लोकतान्त्रिक विधिको प्रक्रिया पुग्यो पुगेन हेर्न बाँकी छ

हेटौंडा । बागमती प्रदेश कांग्रेस संसदीय दलका नेता तथा प्रदेशका मुख्यमन्त्री बहादुर सिंह लामाले संसदीय दलको नेताको हैसियत गुमाएसँगै लोकतान्त्रिक विधि र प्रक्रिया पुग्यो पुगेन भन्ने हेर्न बाँकी नै रहेको बताएका छन् ।
आफूविरुद्धको अविश्वास प्रस्तावमा उनले यस्तो बताएका हुन् । मंगलबार कांग्रेस संसदीय दलको बैठकमा भएको मत विभाजनमा अविश्वास प्रस्तावको पक्षमा २२ र विपक्षमा १५ सांसदले मत दिएका थिए ।

सञ्चारकर्मीसँग कुरा गर्दै लामाले भने–‘नेपाली कांग्रेस पार्टी लोकतान्त्रिक विधिमा विश्वास गर्ने पार्टी हो । त्यसले गर्दा अहिलेको प्रक्रियामा लोकतान्त्रिक विधिको प्रक्रिया पुग्यो पुगेन हेर्न बाँकी छ ।’

आजको मत विभाजनमा आफ्नो पक्षमा बहुमत नभएपछि दलको नेता रिक्त हुने उनको दावी छ । दलको नेता चयन गर्न चुनाव गर्नुपर्ने भन्दै त्यसका लागि भोलीसम्म कुर्नुपर्ने पनि बताए ।

यद्यपी उनले मुख्यमन्त्री हुन संसदीय दलको नेता नै हुनुपर्ने भन्ने नरहेको भन्दै आफूलाई कसैले हटाउन नसक्ने बताए ।