बैतडीमा रातिको समयमा गाडी चलाउन रोक
काठमाडौँ, भदौ १७ । अविरल वर्षासँगै बाढीपहिरोको जोखिम बढेपछि बैतडीमा राति गाडी चलाउन रोक लगाइएको छ ।
जिल्ला प्रशासन कार्यालय बैतडीले रातिको समयमा राजमार्ग र सहायक सडकमा सवारीसाधन सञ्चालनमा रोक लगाएको हो ।
प्रशासनले जिल्लावासीलाई पनि आकस्मिक अवस्थामा बाहेक यात्रा नगर्न आह्वान गरेको छ । तीन दिनदेखि लगातार वर्षा हुँदा सुदूरपश्चिम प्रदेशका बैतडीसहितका जिल्लाको जनजीवन प्रभावित भएको छ ।
महाकाली नदीको सतह बढेकाले किनारका बासिन्दालाई चनाखो रहन आग्रह पनि आग्रह गरिएको छ ।
बैतडीका प्रमुख जिल्ला अधिकारी पुण्यविक्रम पौडेलले विपदको जोखिम भएकाले स्थानीय उच्च सतर्कता अपनाउन, जोखिम भएका स्थानमा नबस्न र अति आवश्यक नभई यात्रा नगर्न भनिएको बताए ।
प्रकाशित मिति: १७ भदौ २०८२, मंगलबार
