बुद्ध एयरका सञ्चालक बस्नेतको पार्टी आयोगमा दर्ता, २० प्रतिशत भन्दा कम मत पाए सरकारमा नजाने

काठमाडौं । बिहिबार दर्ता भएको बुद्ध एयरका सञ्चालक बिरेन्द्रबहादुर बस्नेतको नयाँ राजनीतिक दल ‘गतिशील लोकतान्त्रिक पार्टी’ ले २० प्रतिशत भन्दा कम मत पाए सरकारमा सामेल नहुने घोषणा गरेको छ ।

यद्यपी उक्त पार्टीमा बस्नेत सदस्य मात्रै बनेका छन् भने बिहीबार आयोगमा दर्ता गरिएको उक्त दलको अध्यक्ष समाजशास्त्री दिनेश प्रसाईं छन् । महासचिवमा पियुषप्रसाद कायस्थ छन् ।

पार्टीको विधानअनुसार पदाधिकारीहरूले प्रत्यक्ष चुनाव लड्न नपाउने व्यवस्था गरिएको छ । त्यसैले बस्नेत नेतृत्वमा नभए पनि सदस्यका रूपमा आगामी चुनावमा उम्मेदवारी दिन सक्नेछन् ।

पार्टीले नयाँ पुस्ता र भावी पुस्ताको लागि समावेशी र समतामूलक राजनीतिक संस्कार विकास गर्नुपर्ने आवश्यकता औंल्याएको छ । पार्टीको तयारीअनुसार संरचनामा एक अध्यक्ष र पाँच जना महासचिव रहनेछन् । बाँकी सदस्यहरू विभिन्न पेशागत समूहबाट चयन गरिने छन् ।

बस्नेतले करिब पाँच–छ महिनादेखि नयाँ दल गठनबारे गृहकार्य गर्दै आएका थिए । २१ फागुनमा आगामी निर्वाचन घोषणा भएपछि उनको राजनीतिक पहलले तीव्रता पाएको हो ।

साथै पार्टीले मन्त्री प्रधानमन्त्रीलगायतका सार्वजनिक पदमा दुई पटक भन्दा बढी प्रतिनिधित्व गर्ने नपाइने अवधारणा अघि सारेको छ ।

पार्टी कार्य समितिका पदाधिकारी र सार्वजनिक पदमा जाने व्यक्ति छुट्टाछुट्टै हुने यसको अवरधाणा छ ।