सुनसरीबाट स्रोत नखुलेको १५ लाख नगदसहित दुई जना पक्राउ

काठमाडौँ । सुनसरीको बराहक्षेत्र नगरपालिका–१ स्थित कोशीपुरबाट प्रहरीले स्रोत नखुलेको नगद सहित दुई जनालाई पक्राउ गरेको छ ।

पक्राउ पर्नेमा धनकुटा शहिदभुमी गाउँपालिका–२ घर भएका २० वर्षीय अपित राई र ३१ वर्षीय कबिराज राई छन् ।

बुधबार साँझ पक्राउ परेका आरोपीहरूको साथबाट १५ लाख ३४ हजार नगद बरामद गरिएको जिल्ला प्रहरी कार्यालय सुनसरीले जनाएको छ ।

अस्थायी प्रहरी पोष्ट चतरापुलबाट खटिएको टोलीले धरानबाट आउँदै गरेको प्रदेश–०२–०१६ प ५७३३ नम्बरको मोटरसाइकल चेकजाँच गर्दा सो रकम फेला पारेको हो । घटनाबारे प्रहरीले अनुसन्धान गरिरहेको छ ।