निर्वाचन आयोगको निर्णयविरुद्ध देउवा पक्ष सर्वोच्चमा, रिट दर्ता हुने प्रक्रियामा

काठमाडौं । नेपाली कांग्रेसको शेरबहादुर देउवा समूह सर्वोच्च अदालत पुगेको छ ।

विशेष महाधिवेशनबाट नव निर्वाचित सभापति गगनकुमार थापा समूहलाई आधिकारिकता दिने निर्वाचन आयोगको निर्णयविरुद्ध देउवा पक्ष सर्वोच्च पुगेको हो ।

कार्यवाहक सभापति पूर्णबहादुर खड्का, विमलेन्द्र निधिलगायतका नेताहरू आयोगको निर्णयविरुद्ध अन्तरिम आदेश माग्दै सर्वोच्च गएका हुन्।

अधिवक्ता लक्ष्मी दाहाल रावलका अनुसार रिट निवेदन दर्ता हुने प्रक्रियामा रहेको छ । उनका अनुसार विशेष महाधिवेशन पक्षधरले विधि विधानविपरीत महाधिवेशन बोलाएर नयाँ कार्यसमिति चयन गरेकाले सो महाधिवेशन अवैधानिक करार गर्न माग गरिएको छ ।

काठमाडौंको भृकुटीमण्डपमा पुस २७ देखि ३० सम्म चलेको विशेष महाधिवेशनबाट नयाँ कार्यसमिति निर्वाचित भएको थियो ।

सो कार्यसमितिलाई आयोगले शुक्रबार आधिकारिकता दिने निर्णय गरेको थियो ।

त्यसपछि शनिबार बसेको देउवा समूहको केन्द्रीय कार्यसमिति बैठकले आयोगको निर्णयलाई कानुनी रूपमा चुनौती दिने निर्णय गरेको थियो। सो समूहले गगन थापा र विश्वप्रकाश शर्मा पक्षले आयोजना गरेको विशेष महाधिवेशन वैधानिक नभएको र त्यसको कुनै राजनीतिक औचित्य नरहेको दाबी गर्दै आएको छ।