इरान युद्ध शुरु भएयता १३ जहाज निशानामा

तेहरान । मध्यपूर्वमा बढ्दो युद्ध तनावका बीच खाडी क्षेत्रमा जहाजमाथि आक्रमणका घटना तीव्र रूपमा बढेका छन् । बेलायतको समुद्री सुरक्षा निगरानी संस्था बेलायती समुद्री व्यापार सञ्चालन (यूकेएमटीओ)का अनुसार फेब्रुअरी २८ देखि मार्च ११ सम्म अरब गल्फ, हर्मुज जलडमरूमध्य र ओमानको खाडी क्षेत्रमा कम्तीमा १३ वटा जहाज आक्रमणको निशानामा परेका छन् ।

यसबीच बुधबार राति उम्म कासर बन्दरगाह नजिक थप दुई जहाजमा आक्रमण भएको छ । यो बन्दरगाह बस्रा सहर नजिक पर्छ । इराकी बन्दरगाह प्राधिकरणका अनुसार उक्त घटनामा एक जनाको मृत्यु भएको छ भने ३८ जना घाइते भएका छन् ।

यसैबीच यूकेएमटीओले जहाजमाथि अर्काे आक्रमणको घटनाबारे जानकारी दिँदै जेबेल अलीको उत्तरतर्फ एउटा कन्टेनर जहाज अज्ञात प्रक्षेप्यले लागेको जनाएको छ । जहाजका क्याप्टेनले दिएको जानकारीअनुसार उक्त प्रहारपछि जहाजमा सानो आगलागी भएको थियो ।