टेम्पो प्रकरणमा छानबिन गर्न सुदूरपश्चिम सरकारद्वारा समिति गठन, सात दिनभित्र प्रतिवेदन बुझाउन निर्देशन

धनगढी । कैलालीको गोदावरी नगरपालिका–४ गाइमारे चुरे वन क्षेत्रमा अतिक्रमण हटाउने क्रममा टेम्पो भीरबाट खसेको घटनाबारे छानबिन गर्न सुदूरपश्चिम प्रदेश सरकारले समिति गठन गरेको छ ।

उद्योग, पर्यटन, वन तथा वातावरण मन्त्रालयले प्रदेश वन निर्देशक हेमराज विष्टको संयोजकत्वमा पाँच सदस्यीय छानबिन समिति बनाएको हो ।

छानबिन समितिमा जिल्ला प्रशासन कार्यालय कैलालीका सहायक प्रमुख जिल्ला अधिकारी, वन कार्यालयका वरिष्ठ अधिकारी, यातायात कार्यालयका इन्जिनियर र मन्त्रालयका कानुन अधिकृत सदस्य रहेका छन् ।

डिभिजन वन कार्यालय कैलालीले विभिन्न स्थानमा अतिक्रमण हटाउने अभियान सञ्चालन गरिरहेको अवस्थामा शुक्रबार ९जेठ २९० गोदावरी सामुदायिक वन क्षेत्रभित्र टेम्पो भीरबाट पल्टाइएको थियो ।

गोदावरी नगरपालिका–४ बासपानीकी धनादेवी धामीले जीविकोपार्जनका लागि सामान ओसारपसार गर्न प्रयोग गर्दै आएको टेम्पो वन कर्मचारीले भीरबाट खसालेका थिए ।

त्यससम्बन्धी फोटोरभिडियो सामाजिक सञ्जालमा सार्वजनिक भएपछि सरकारको चौतर्फी आलोचना गरिँदै छ । यही विषयमा मन्त्रालयले छानबिन प्रक्रिया अघि बढाएको हो ।

यसअघि वन कार्यालय प्रमुखले टेम्पो नियतवश नखसाइएको बताएका थिए भने घटनामा संलग्न कर्मचारीहरू प्रहरीको निगरानीमा रहेका छन् ।

वन अतिक्रमण हटाउने क्रममा टेम्पो भिरमा खसालिएको घटनामा प्रहरीले १० जनालाई नियन्त्रणमा लिएर सोधपुछ थालेको छ ।

जिल्ला प्रहरी कार्यालय कैलाली र इलाका प्रहरी कार्यालय मालाखेतीको संयुक्त टोलीले घटनाबारे सोधपुछका लागि १० जनालाई नियन्त्रणमा समेत लिएको छ

समितिलाई घटनाको वास्तविकता पत्ता लगाई सात दिनभित्र प्रतिवेदन बुझाउन निर्देशन दिइएको छ । प्रदेश सरकारले छानबिन प्रतिवेदनका आधारमा आवश्यक कारबाही गर्ने जनाएको छ ।