अर्जेन्टिना समूह विजेता बन्दै नकआउटमा, मेसीको जादुमय प्रहार

काठमाडौं । साविक विजेता अर्जेन्टिनाले उत्कृष्ट लयलाई निरन्तरता दिँदै जारी फिफा विश्वकपको समूह ‘जे’मा शतप्रतिशत जितसहित नकआउट चरणमा प्रवेश गरेको छ ।

अन्तिम समूहगत खेलमा जोर्डनलाई ३–१ ले पराजित गर्दै अर्जेन्टिनाले नौ अंकसहित समूह विजेताको रूपमा अन्तिम ३२ मा स्थान सुरक्षित गरेको हो।

अर्जेन्टिनाको जितमा जियोभानी लो सेल्सो, लाउटेरो मार्टिनेज र कप्तान लियोनल मेसीले समान एक–एक गोल गरे। मेसीले लगातार तेस्रो समूहगत खेलमा पनि गोल गर्दै टोलीको उत्कृष्ट लय कायम राखे।

जोर्डनका लागि मुसा अल–तामरीले सान्त्वना गोल गरे। लगातार तीनै खेलमा पराजित भएको जोर्डन अंकविहीन रहँदै प्रतियोगिताबाट बाहिरिएको छ।

यसै समूहको अर्को खेलमा अस्ट्रिया र अल्जेरियाबीच रोमाञ्चक ३–३ को बराबरी भएको छ। बराबरीसँगै दुवै टोलीले समान चार–चार अंक जोड्दै नकआउट चरणमा स्थान सुरक्षित गरेका छन्।

तीन खेलबाट नौ अंक जोडेको अर्जेन्टिना समूहको शीर्ष स्थानमा रहँदा, चार–चार अंक भएका अस्ट्रिया र अल्जेरिया क्रमशः दोस्रो र तेस्रो स्थानमा रहँदै गोलअन्तर तथा प्रतियोगिताको टाइब्रेकरका आधारमा अन्तिम १६ मा प्रवेश गरेका छन्। जोर्डन भने कुनै अंक जोड्न नसकी समूह चरणबाटै बाहिरिएको छ।

समूह चरणमा लगातार तीन खेलमा गोल गर्दै कप्तान मेसीले अर्जेन्टिनाको उपाधि रक्षा अभियानलाई थप मजबुत बनाएका छन् ।