अल्जेरियालाई हराउँदै स्विट्जरल्याण्ड विश्वकपको अन्तिम १६ मा प्रवेश

एजेन्सी । स्विट्जरल्यान्ड अल्जेरियामाथि सहज २-० जित निकाल्दै लगातार चौथो पटक फिफा विश्वकप २०२६ को अन्तिम १६ मा पुगेको छ।

अल्जेरियालाई पराजित गर्दै स्विट्जरल्याण्ड अन्तिम १६ को यात्रामा प्रवेश गरेको हो ।

क्यानडाको बिसी प्लेस भ्यानकुभरमा भएको अन्तिम–३२ को खेलमा ब्रिल एम्बोलो र डान एन्डोएको गोलमा प्रशिक्षक मुराट याकिनको टोलीले सहजै खेल जित्यो ।

स्विट्जरल्यान्डले खेलको १०औँ मिनेटमै अग्रता लियो। योहान मान्जाम्बीले पेनाल्टी क्षेत्रभित्र उत्कृष्ट दौड लगाउँदै दिएको पासलाई एम्बोलोले नजिकैबाट गोल गरे।

सन् २०१४ देखि २०२१ सम्म स्विट्जरल्यान्डका प्रशिक्षक रहेका भ्लादिमिर पेटकोभिच अहिले अल्जेरियाको जिम्मेवारीमा छन्। पहिलो हाफमा थप गोल हुन नदिएपछि दोस्रो हाफमा टोली फर्कने अपेक्षा गरिए पनि त्यो सम्भव हुन सकेन।

दोस्रो हाफ सुरु भएको एक मिनेटमै स्विट्जरल्यान्डले अग्रता दोब्बर बनायो। अल्जेरियाका रफिक बेलघालीको कमजोर क्लियरेन्सलाई नियन्त्रणमा लिएका एन्डोएले पेनाल्टी क्षेत्रभित्रबाट शान्त रूपमा गोल गर्दै टोलीलाई २–० को अवस्थामा पुर्‍याए।

अल्जेरियाका गोलरक्षक लुका जिदानले बचाउने प्रयास गरे पनि सफल हुन सकेनन्।
त्यसपछि स्विट्जरल्यान्डले खेलमाथि पूर्ण नियन्त्रण कायम राख्यो। पछिल्ला १७ खेलमध्ये केवल एकमा मात्र पराजित भएको टोलीविरुद्ध अल्जेरियाले स्पष्ट गोलका अवसर सिर्जना गर्न सकेन।

यो जितसँगै स्विट्जरल्यान्डले विश्वकपमा पहिलो पटक लगातार ३ खेल जित्ने कीर्तिमान पनि बनाएको छ। यसअघि समूह चरणमा उसले बोस्निया एन्ड हर्जगोभिना र क्यानडालाई पराजित गरेको थियो।

स्विट्जरल्यान्डले जुलाई ७ मा भ्यानकुभरमै कोलम्बिया वा घानामध्ये एकसँग क्वार्टरफाइनल प्रवेशका लागि प्रतिस्पर्धा गर्नेछ।

यसअघिको खेलमा कप्तान क्रिस्टियानो रोनाल्डोको बराबरी गोल र इन्जुरी समयमा गोन्सालो रामोसको निर्णायक प्रहारसँगै पोर्चुगलले क्रोएसियामाथि २–१ को रोमाञ्चक जित निकाल्दै विश्वकप फुटबलको अन्तिम १६ मा स्थान सुरक्षित गरेको थियो ।