लण्डन, साउन १४ एजेन्सी

कोरोना महामारीपछि भएको पहिलो अन्तर्राष्ट्रिय टेष्ट सिरिजमा घरेलु टोली इंग्ल्यान्डले तेस्रो तथा अन्तिम खेलमा वेस्ट इन्डिजलाई २ सय ६९ रनको फराकिलो अन्तरले हराउँदै सिरिज २–१ ले जितेको छ ।

इंग्ल्यान्ड पहिलो खेलमा पराजित भएपनि उत्कृष्ट पूनरागमन सहित टेष्ट सिरिज जितेको हो । तेस्रो टेस्टमा ३ सय ९९ रनको लक्ष्य पछ्याएको वेस्ट इन्डिजले चौथो दिन वर्षाको कारण खेल सुचारु हुन सकेन । पाँचौ दिन इंग्ल्यान्डले उत्कृष्ट बलिङ गर्दै वेस्ट इन्डिजलाई ३७.१ ओभरमा १ सय २९ रनमा अल आउट गर्यो ।

ओपनर जोन क्याम्पबेललाई स्टुअर्ट ब्रोडले तेस्रो दिनमानै शून्यमा जो रुटबाट क्याच आउट गराएका थिए । त्यस्तै ब्रोडले बटलरबाट केमार रोचलाई ४ रनमा क्याच आउट गराएका थिए । ब्रोडले ओपनर क्रेग ब्रेथवेटलाई १९ रनमा एलबिडब्लू आउट गर्दै आफ्नो टेष्ट करिअरको पाँच सय विकेट पूरा गरे । ब्रोड टेष्टमा पाँच सय विकेट पूरा गर्ने विश्वका सातौं बलर हुन् । तीव्र गतिका बलरमध्य ब्रोड यस उपलब्धि हासिल गर्ने चौथो खेलाडी हुन् । इंग्ल्यान्डका टेष्टमा पाँच सय विकेट लिने दोस्रो बलर हुन् ।

वेस्टइन्डिजका शाई होपलाई क्रिस वोक्सले ब्रोडबाट ३१ रनमा क्याच आउट गराए । वोक्सलेनै शम्राह बूक्सलाई २२ रनमा बटलरबाट क्याच आउट गराउँदै पेभिलिएन फर्काए । रोस्टन चेश ७ रनमा रन आउट हुन पुगे । जेसन होल्डर १२ रनमा आउट भए । जर्मेन ब्ल्याककवुड २३ रनमा क्याच आउट भए । इंग्ल्यान्डका क्रिस वोक्सले ११ ओभरमा ५० रन खर्चेर ५ विकेट लिए । स्टुअर्ट ब्रोडले ८.१ ओभरमा १ मेडन सहित ३६ रन खर्चेर ४ विकेट लिए ।

त्यसअघि ५८ ओभरमा २ विकेट गुमाउँदै २ सय २६ रन बनाउँदै दोस्रो इनिङ समाप्तीको घोषणा गरेको थियो । ओपनर रोरी बर्न्सले १ सय ६३ बलमा १० चौका सहित सर्वाधिक ९० रनको योगदान दिए । त्यस्तै अर्का ओपनर डोम सिब्लेले १ सय ३२ बलमा ७ चौका सहित ५६ रन जोडे । कप्तान जो रुट ५६ बलमा ८ चौका र १ छक्का सहित ६८ रनमा अविजित रहे । वेस्ट इन्डिजका रोस्टन चेश र जेसन होल्डरले १(१ विकेट लिए ।

त्यसअघि वेस्ट इन्डिज पहिलो इनिङमा ६५ ओभरमा वेस्टइन्डिजले १ सय ९७ रनमा अल आउट भएको थियो । ओपनर क्रेग ब्रेथवेटलाई स्टुअर्ट ब्रोडले कप्तान जो रुटबाट १ रनमा क्याच आउट गराए । जोफ्रा आर्चरले अर्का ओपनर जोन क्याम्पबेललाई रोरी बर्न्सबाट ३२ रनमा क्याच गराउँदै पेभिलिएन फर्काए । उनले ५० बलमा ३ चौका प्रहार गरे ।

जेम्श एन्डरसनले शाई होपलाई १७ र शम्राह बूक्सलाई ४ रनमा जस बटलरबाट क्याच गराउँदै पेभिलिएन फर्काएपछि वेस्टइन्डिजले रन जोड्न संघर्ष गरेको थियो । रोस्टन चेश ९ रनमा आउट भए । कप्तान जेसन होल्डरलाई ब्रोडले ४६ रनमा एलविडब्लू आउट गरे । योसँगै होल्डरले टेष्टमा आफ्नो दुइ हजार रन पूरा गरेका छन् । उनी वेस्टइन्डिजबाट एक सय विकेट लिने र दुइ हजार रन बनाउँने तेस्रो खेलाडी बनेका छन् ।

शेन डोरीच ३७ र रेहकम कर्नवाल १० रनमा आउट भए । इंग्ल्यान्डका स्टुअर्ट ब्रोडले १४ ओभरमा ४ मेडन सहित ३१ रन खर्चेर ६ विकेट लिए । जेम्श एन्डरसनले २ विकेट लिए । क्रिस वोक्स र आर्चरले १–१ विकेट लिए ।

त्यसअघि ओल्ड ट्राफर्ड म्यानचेस्टरमा टस हारेर ब्याटिङको निम्तो पाएको इंग्ल्यान्ड १११।५ ओभरमा ३ सय ६९ रनमा अल आउट भएको थियो । इंग्ल्यान्डका युवा ब्याट्सम्यान ओली पोपले सर्वाधिक ९१ रनको योगदान दिए । पोप १ सय ५० बलमा ११ चौका प्रहार गरे । शेनन ग्याब्रियलले बोल्ड आउट गरेपछि ओली शतक बनाउन ९ रनले चुकेका थिए । विकेटकिपर जस बटलरले १ सय ४२ बलमा २ छक्का र ७ चौका सहित ६७ रनमामा क्याच आउट भए ।

पाँचौ विकेटका लागि पोप र बटलरले १ सय ४० रनको महत्वपूर्ण साझेदारी गरेका थिए। ओपनर रोरी बर्न्स १ सय ४७ बलमा ४ चौका सहित ५७ रनमा क्याच आउट भए । अर्का ओपनर डोम सिब्लेलाई केमार रोचले एलबिडब्लू शून्यमा आउट गरे । कप्तान जो रुट १७ रनमा रन आउट भए । रोचले बेन स्टोक्सलाई २० रनमा बोल्ड आउट गरे ।

तल्लोक्रममा स्टुअर्ट ब्रोडले ४५ बलमा ९ चौका र १ छक्का सहित ६२ रन जोड्दै इंग्ल्यान्डलाई बलियो योगफलमा पुर्याए । ब्रोडले ३३ बलमा अर्ध शतक पूरा गरेका थिए । डोम बेस १८ रनमा अविजित रहे । वेस्टइन्डिजका तीब्र गतिका बलर केमार रोचले सर्वाधिक ४ विकेट लिए । यससँगै रोचले टेष्ट करिअरमा २ सय विकेट पूरा गरे । त्यस्तै शेनन ग्याब्रियलले र रोस्टन चेशले २–२ विकेट लिए । कप्तान जेसन होल्डरको नाममा १ विकेट रह्यो ।

पहिलो टेष्टमा वेस्टइन्डिज ४ विकेटले विजयी हुँदा दोेस्रो टेष्टमा १ सय १३ रनले पराजित भएको थियो । इंग्ल्यान्डले अब पाकिस्तानसँग टेस्ट सिरिज खेल्नेछ । वेस्टइन्डिजका खेलाडी भने क्यारेबियन प्रिमियर लिगमा व्यस्त हुनेछन् ।

प्रकाशित मिति: १४ श्रावण २०७७, बुधबार