फ्रान्स, भदौ २४ एजेन्सी

सुपरस्टार युवा फरवार्ड केलियन एमबाप्पेविनै विश्व विजेता फ्रान्सले युइएफए नेसन्स लिगमा विश्व उपविजेता क्रोएसियामाथि सानदार जित हात पारेको छ ।

कोरोना संक्रणमका कारण एमबाप्पे टोलीमा नरहेपनि फ्रान्सले घरेलु मैदानमा क्रोएसियामाथि ४–२ को पूनरागमन जित हात पारेको हो । २०१८ मा रसियामा भएको विश्वकपको फाइनलमा पनि फ्रान्सले ४–२ कै जित निकाल्दै विश्व च्याम्पियन बनेको थियो ।

फ्रान्सको जितमा एन्टोइन ग्रिजमन, डायोट उपमेकानो र ओलिभर जिरुउडले गोल गरे । एक गोल उपहार पाएको थियो । क्रोएसियाका डिजान लोभरेन र जोसिप ब्रेकालोले गोल गरे ।

स्टेट डि फ्रान्स पेरिसमा मंगलबार राति भएको प्रतिस्पर्धात्मक खेलमा पाहुना टोली क्रोएसियाले खेलको १७औं मिनेटमा डिजान लोभरेनको गोलबाट अग्रता बनाएको थियो । कर्नरबाट आएको बललाई फ्रान्सका डिफेन्डरले हेडमार्फत क्लियर गर्ने प्रयास गरेपनि क्लियर हुन नसकेको बललाई लोभरेनले नियन्त्रणमा लिदै एक डिफेन्डरलाई बिट गर्दै गरेको प्रहार गोलमा परिणत भएको थियो ।

२५औं मिनेटमा क्लेमेन्ट लेङ्लेटले क्रोएसियाको प्रहारलाई ब्लक गर्दै अर्को गोल टारे । ३३औं मिनेटमा एन्टोइन ग्रिजमनको प्रहारलाई क्रोएसियाका गोलरक्षक डोमिनिक लिभाकोभिकले उत्कृष्ट बचाउ गर्दा फ्रान्स बराबरीबाट चुक्यो ।

४३औं मिनेटमा ग्रिजमनले गोल गर्दै फ्रान्सलाई खेलमा फर्काए । एन्थोनी मार्सियलबाट फर्लान्ड मेन्डी हुदै विसाम विन यडरबाट मार्सियललाई नै आएको पासलाई ग्रिजमनले जाली चुमाएका थिए ।

पहिलो हाफको इन्ज्युरी समयमा क्रोएसियाका गोलरक्षक डोमिनिक लिभाकोभिकले आत्मघाती गोल गरेपछि फ्रान्सले खेलमा २–१ को अग्रता लिन सफल भयो । विसाम विन यडरको लो क्रसलाई मार्सियलले गरेको प्रहार क्रोएसियाका गोलरक्षकलाई लाग्दै गोलमा परिणत भएको थियो ।

५५औं मिनेटमा क्रोएसियाले बराबरी गोल फर्कायो । माटियो कोभासिसको पासमा जोसेप ब्रेकालोले आफसाइड बिट ट्रयाप गर्दै पेनाल्टी बक्सबाट दुई डिफेन्डर मेन्डी र लेङ्लेटलाई पबट गर्दै गरेको प्रहारले पोस्टको दशा लिएको थियो । त्यसको १० मिनेटपछि एन्टोइन ग्रिजमनको कर्नरमा डायोट उपमेकानोले हेडरमार्फत गोल गर्दै फ्रान्सलाई ३–२ ले अघि बढाए ।

७७औं मिनेटमा ओलिभर जिरुउडले पेनाल्टीमार्फत गोल गर्दै फ्रान्सलाई ४–२ को पूनरागमन जित दिलाए । मार्सेलो ब्रोजोभिकले पेनाल्टी बक्समा विपक्षी खेलाडीलाई फल गरेपछि प्राप्त पेनाल्टीमा जिरुउड चुकेनन् । ८९औं मिनेटमा निकोलो भ्लासिकको प्रहार पोस्टमा लागेर फर्कदा क्रोएसिया गोलअन्तर घटाउनबाट चुक्यो ।

यस जितसँगै फ्रान्स लिग ‘ए’ ३ मा अपराजित रहँदै ६ अंक जोडेर शीर्ष स्थानमा छ । अपराजित नै रहेको पोर्चुगल लगोलअन्तरमा अगाडि छ । स्वीडेन र क्रोएसियाले अंकको खाता खोल्न सकेका छैनन् ।

प्रकाशित मिति: २४ भाद्र २०७७, बुधबार