क्रिकेट महाकुम्भ आइपिएल आजदेखि

काठमाडौं, असोज ३ एजेन्सी

विश्वकै सर्वाधिक लोकप्रिय फ्रेन्चाइज टि२० प्रतियोगिता इन्डियन प्रिमियर लिग आइपिएलको १३ औं संस्करण आजदेखि संयुक्त अरव इमिरेट्स यूएईमा सुरु हुँदैछ ।

आज उद्धघाटन खेलमा आइपिएलमा दुई सर्वाधिक सफल फ्रेन्चाइज टोली मुम्बई इन्डियन्स र चेन्नई सुपरकिंग्सबीच प्रतिस्पर्धा हुने छ । कोरोना महामारीको कारण आइपिएल भारत बाहिर यूएईमा हुन लागेको हो । यस अघि सन् २००९ मा दक्षिण अफ्रिकामा पूरै संस्करण र २०१४ मा यूएईमा आइपिएलका सुरुवाती २० खेल भएका थिए ।

आइपिएलका खेल शारजाह, आबूधाबी र दुबई गरि तीन स्थानमा हुने छन् । तीन स्टेडियममा लिग चरणका ५६ र प्ले अफ र फाइनल गरि चार गरि कुल ६० खेल हुने छन् । आइपिएलमा खेलको क्रममा कुनैपनि खेलाडीमा कोरोना संक्रमण देखिएमा टोलीमा रहेका जुनसुकै खेलाडी परिवर्तन गर्न पाइने छ । आइपिएल पहिलो पटक दर्शक विनाको रंगशालामा हुँदैछ । जसले गर्दा मैदानमा समर्थकको साथ र समर्थन नरहने हुँदा खेलाडीको प्रर्दशनमा केहि असर पर्न सक्छ ।

किंग्स इलेभेन पञ्जाब, दिल्ली क्यापिटल्स र रोयल च्यालेन्जर्स बेंगलोर पहिलो उपाधि जित्न चाहान्छन् । चेन्नई सुपर किंग्स चौथो, मुम्बई इन्डियन्स पाँचौ, कोलकाता नाइट राइडर्स तेस्रो, राजस्थान रोयल्स र सनराइजर्स हैदराबाद समान दोस्रो उपाधि जित्न चाहान्छ । यस पटक होम र अवे मैदानको फाइदा टोलीले उठाउने छैनन् । तीन स्टेडियममा हरेक टोलीले एक अर्कासँग दुई दुई खेल खेल्ने छन् । शीर्ष चार टोली प्ले अफमा पुग्ने छन् । पुछारका चार टोली लिग चरणबाटैं बाहिरिने छन् ।

आइपिएलको लिग चरणको खेल नोभेम्बर ३ सम्म चल्ने छन् । प्ले अफ र फाइनलको स्थान भने केहि समयपछि निर्धारण हुने छ । सम्पूर्ण आइपिएल खेलहरु नेपाली समय अनुसार बेलुका ७स् ४५ र दिउँसो ३ः४५ देखि सुरु हुने छ । सबै खेलको प्रत्यक्ष प्रसारण स्टार स्पोर्ट्स च्यालनले गर्ने छ । हैदराबादले डेभिड वार्नरलाई कप्तानको जिम्मेवारीमा पुनः निरन्तरता दिएको छ ।

किंग्स इलेभेन पञ्जाबले ओपनर तथा विकेटकिपर लोकेश राहुललाई पहिलो पटक कप्तान गराउँदै छ । विराट कोहलीलाई उपाधि जित्नु पर्ने दबाब छ । दिल्लीले आइतबार पञ्जाबसँग खेल्दै सुरुवात गर्ने छ । सोमबार हैदराबादले बेंगलोरसँग खेल्दै सुरुवात गर्ने छ । मंगलबार राजस्थानले चेन्नईसँग खेल्दै सुरुवात गर्नेछ । बुधबार कोलकाताले मुम्बईसँग खेल्दै सुरुवात गर्ने छ । यस पटक हरेक बलमा थर्ड अम्पायरले नो बल छ वा छैन हेर्नेछन् ।

यता नेपाली लेग स्पिनर सन्दीप लामिछाने लगातार तेस्रो सिजन दिल्ली क्यापिटल्सबाट खेल्ने छन् । यसै साता सम्पन्न क्यारेबियन प्रिमियर लिग सिपिएल मा जमैका तलाबाजबाट खेल्दै राम्रो प्रर्दशनका साथ सोमबार यूएई पुगेका छन् । आइपिएलको नियम अनुसार ६ दिनमा तीन पटक कोरोना परिक्षण गराउनुपर्छ । रिपोर्ट नेगेटिभ आएमा मात्र आइपिएल खेल्न पाउने छन् । त्यसैले सन्दीप पहिलो खेल खेल्न पाउने वा नपाउने अनिश्चत छ ।