काठमाण्डौ, फागुन १८
गत शुक्रबार रिलिज भएको सिनेमा ‘लुट–२’ ले बक्स अफिसमा तहल्का नै मच्चाएको छ । निश्चल बस्नेतको निर्देशन माधव वाग्ले र नरेन्द्र महर्जनको निर्माण रहेको ‘लुट–२’ ले रिलिज भएको चार दिनमा झण्डै साढे पाँच करोडको ग्रस कलेक्शन गरेको छ ।

सिनेमाको व्यापार यहि गतिमा अघि बढ्दै गयो भने छक्का पञ्जाको किर्तिमानी पनि तोड्ने सम्भावना देखिन्छ । शिव रात्रीको दिन पारेर रिलिज भएको सिनेमाले पहिलो दिन १ करोड ५२ लाख दोस्रो दिन १ करोड ६६ लाख तेस्रो दिन ७३ लाख र चौथौँ दिन सोमबार काठमाण्डौमा एक करोड माथि र काठमाण्डौ बाहिर २५ लाखको कारोबार गरेको जानकारी प्राप्त भएको छ ।

यस हिसाबले सिनेमाले चार दिनमा झण्डै साढे पाँच करोडको कारोबार गरेको छ । सिनेमामा अभिनेता दयाहाङ राई, सौगात मल्ल, ऋचा शर्मा, कर्मा, विपिन कार्की लगायतको अभिनय छ ।