अमरेशको चुनौती- भरिया होइन, २५ करोडका मालिक समातेर देखाउनू

काठमाडौं । स्वतन्त्र सांसद डा. अमरेशकुमार सिंहले नेपालमा सुन र अवैध मुद्रा तस्करी प्रकरणमा भरियामात्रै समातिने गरेको बताएका छन्।

बुधबार बसेको प्रतिनिधिसभाको बैठकमा बोल्दै उनले तस्करीको सामानका मालिक कहिल्यै नसमातिने विडम्बना भएको पनि बताएका छन्।

‘२५ करोड बराबरको विदेशी मुद्रासहित व्यक्ति समातिएको विषयमा यहाँ धेरै माननीयज्यूले कुरा उठाउनुभयो । माननीय गृहमन्त्रीज्यूपनि यहीँ हुनुहुन्छ, नेपालमा जहिल्यै भरिया मात्रै समातिन्छन् । मालिक किन समातिँदैनन् ?’, उनले सोधे, ‘मेरो आग्रह छ, मालिक समातेर देखाउनुस् । २५ करोड कुनै भरियाको पैसा होइन । हिजो सार्वजनिक लेखा समितिको बैठक बसिरहेको थियो, मैले यो पैसा सुन तस्करको हो भनेको थिएँ ।’

पालमा यसअघिका विभिन्न सुन तस्करी काण्डका प्रतिवेदन सदनमा टेबुल गर्न पनि माग गरेका छन् । सरकारले विभिन्न प्रकारका काण्डमा रिपोर्ट बनाएर बाहिर ल्याउन नसकेको उनले गुनासो गरे।

गृहमन्त्री रमेश लेखकलाई मुलुकको पछिल्लो अवस्थाबारे पार्टीको बैठकमा भन्दा पनि सदनमा ब्रिफिङ गर्न पनि उनले सुझाएका छन् ।

पछिल्लो समय काठमाडौं र ललितपुरका विभिन्न ठाउँमा जुलुस निस्किएको बताउँदै उता धनुषास्थित यादव चोकको नाममा गोली नै चलेको उल्लेख गरे ।

‘के देशमा अशान्ति भएको हो ?’, उनले सरकारलाई सोधे, ‘देशको राष्ट्रिय राजनीति र अवस्थाबारे प्रधानमन्त्री केपी शर्मा ओलीले संसद्‍मा जवाफ दिनुपर्छ । आजको दिनमा नेपालको सुरक्षा खतरामा रहेको देखियो । वैदेशिक सम्बन्ध पनि सबैसँग खराब रहेको छ ।’