हर्मुज जलमार्गमा फसेका ६ हजार नाविकको उद्धार गर्न संयुक्त राष्ट्रसङ्घको आग्रह

जेनेभा, ८ साउन । संयुक्त राष्ट्रसङ्घले मध्यपूर्व युद्धका कारण हर्मुज जलमार्गमा फसेका करिब ६ हजार नाविकको उद्धार गरी उनीहरूलाई सुरक्षित रूपमा स्वदेश फर्काउन सम्बन्धित देशहरूलाई आग्रह गरेको छ।

संयुक्त राष्ट्रसङ्घका मानवअधिकार प्रमुख भोल्कर टर्कले हजारौँ नाविकले मानवीय र मानवअधिकारसम्बन्धी गम्भीर सङ्कटको सामना गरिरहेकाले तत्काल पहल गर्न आवश्यक रहेको बताएका छन्।

उनका प्रवक्ता शाबिया मन्तुले अन्तर्राष्ट्रिय समुद्री सङ्गठनको तथ्याङ्क उद्धृत गर्दै हर्मुज जलमार्गमा सयौँ जहाजमा कम्तीमा ६ हजार नाविक फसेको बताए। युद्धविरामका अवधिमा समेत उनीहरूको उद्धार हुन नसकेको उनले उल्लेख गरे।

मन्तुले फसेका नाविकलाई सुरक्षित रूपमा जहाजबाट बाहिर निकाल्न, आवश्यक सामग्री आपूर्ति गर्न तथा स्वदेश फर्काउने व्यवस्था मिलाउन तत्काल सुरक्षित मार्ग उपलब्ध गराउन आग्रह गरे। उनले गैरसैनिक जहाजमाथि हुने आक्रमण अस्वीकार्य रहेको र अन्तर्राष्ट्रिय मानवीय कानुनअन्तर्गत यस्ता जहाज तथा चालकदल संरक्षित रहने बताए।

संयुक्त राष्ट्रसङ्घले राज्य, जहाज मालिक तथा सम्बन्धित सबै पक्षलाई कन्सुलर सहायता, राहत सामग्री, उद्धार तथा स्वदेश फिर्तीका लागि तत्काल समन्वय गर्न आग्रह गरेको छ।

यसबीच, इरान समर्थित हुथी विद्रोहीले रेड सी क्षेत्रमा तेल ट्याङ्करमाथि आक्रमण गरेपछि संयुक्त राज्य अमेरिकाले इरानमाथि नयाँ हवाई आक्रमण सुरु गरेको जनाइएको छ। बढ्दो तनावका कारण विश्व बजारमा कच्चा तेलको मूल्य प्रति ब्यारेल १०० अमेरिकी डलरभन्दा माथि पुगेको उल्लेख गरिएको छ।

अमेरिकी पक्षले हर्मुज जलमार्ग अन्तर्राष्ट्रिय तेल आपूर्तिको प्रमुख मार्ग रहेको जनाएको छ भने इरानले ट्याङ्करहरूको आवागमनमा दबाब सिर्जना गरिरहेको आरोप लगाइएको छ।