डेटा सकिँदा अब कट्ने छैन स्वतः पैसा, नेपाल टेलिकमको नयाँ व्यवस्था लागू

काठमाडौं । नेपाल टेलिकमले डेटा प्याकेज सकिएपछि स्वतः मोबाइल ब्यालेन्स काटिने व्यवस्था अन्त्य गरेको छ । ग्राहकहरूको गुनासो बढेपछि यस्तो निर्णय गरिएको हो ।

सञ्चार तथा सूचना प्रविधि मन्त्रालयका अनुसार अब ग्राहकको डेटा प्याकेज ९० प्रतिशत खपत भइसकेपछि नै एसएमएस तथा मोबाइल एपमार्फत अग्रिम सूचना पठाइनेछ । यसपछि ग्राहकलाई आवश्यकताअनुसार डेटा प्याकेज पुनः नवीकरण गर्न अनुरोध गरिनेछ ।

यसअघि भने डेटा प्याकेज सकिएलगत्तै मुख्य ब्यालेन्सबाट स्वतः रकम कट्ने व्यवस्था थियो, जसले धेरै प्रयोगकर्तालाई अनपेक्षित रूपमा आर्थिक भार परेको गुनासो आउने गरेको थियो ।

नयाँ व्यवस्थाअनुसार ग्राहकले चाहेमा मात्र ‘Pay As You Go’ (पास–यू–गो) प्रणाली प्रयोग गर्न सक्नेछन्। यो सुविधा स्वतः सक्रिय हुने छैन।

उक्त सेवा प्रयोग गर्न इच्छुक ग्राहकले *444# डायल गरी सजिलै enable वा disable गर्न सक्ने व्यवस्था मिलाइएको छ।