अमेरिका–इरान वार्ता अनिश्चित हुँदा फेरि बढ्यो तेलको मूल्य

वासिङ्टन डीसी । अमेरिका र इरानबिचको शान्ति वार्ताले ऊर्जा आपूर्ति सङ्कट समाधान गर्नेमा शङ्का उत्पन्न हुन थालेपछि विश्व बजारमा कच्चा तेलको भाउ बढेको छ ।

बिहीबार अन्तर्राष्ट्रिय बजारमा ब्रेन्ट कच्चा तेलको मूल्य प्रति ब्यारेल १ दशमलव ७ प्रतिशतले बढेर ९६ डलर ५८ सेन्ट पुगेको छ भने वेस्ट टेक्सास इन्टरमिडियट पनि १ दशमलव ६ प्रतिशतले बढेर ब्यारेलकै ९२ डलर ७४ सेन्ट कायम भएको छ । अघिल्लो दिन बजारमा ठुलो उतार–चढाव देखिए पनि बिहीबार मूल्य लगभग स्थिर रहेको थियो ।

इरानमा इजरायल र अमेरिकाको आक्रमणका कारण विश्वव्यापी ऊर्जा आपूर्तिमा अभूतपूर्व अवरोध आएको छ । विशेष गरी स्टेट अफ होर्मुजमा आवागमन प्रभावित हुँदा विश्वको करिब २० प्रतिशत तेल र ग्यास आपूर्ति प्रभावित भएको छ ।

दैनिक करिब १ करोड ३० लाख ब्यारेल तेल प्रवाहमा असर परेको अनुमान विश्लेषकहरूले गरेका छन् । केही पाइपलाइन र वैकल्पिक मार्ग प्रयोग भए पनि आपूर्ति पूर्ण रूपमा सहज हुन सकेको छैन । यसैबिच, शान्ति वार्ता पुनः सुरु गर्ने प्रयास भइरहेका छन् । पाकिस्तानी मध्यस्थतामा वार्ता फेरि सुरु हुनसक्ने सङ्केत देखिएको छ, जहाँ पाकिस्तानी विदेश मन्त्री असिम मुनिरले महत्त्वपूर्ण भूमिका खेलिरहेका छन् ।
यो सहमति भयो भने इरानले स्टेट अफ होर्मुजको ओमानी भाग हुँदै जहाजहरूलाई सुरक्षित रूपमा आवागमन गर्न दिन सक्ने सङ्केत दिएको छ । अप्रिल ८ देखि सुरु भएको दुई साताको युद्धविरामपछि यो सम्भावना बढेको बताइएको छ । तर अमेरिकी नाकाबन्दी र प्रतिबन्धले स्थिति थप जटिल बनाएको छ । अमेरिकी विदेश मन्त्री स्कट बेसेन्टले इरान र रुससँग सम्बन्धित केही तेल कारोबारमा दिइएको छुट नवीकरण नगरिने बताएका छन् ।

अर्कोतर्फ, विश्व बजारमा आपूर्ति घट्दै जाँदा माग उच्च रहँदा तेलको मूल्यमा थप दबाब परेको छ । अमेरिकामा तेल, पेट्रोल र अन्य इन्धनको भण्डारण घटेको तथ्याङ्कले पनि आपूर्ति सङ्कटलाई पुष्टि गरेको छ