मोदीले झालमुरी खाएको पश्चिम बंगालको क्षेत्रमा भाजपा उम्मेदवारको अवस्था कस्तो छ ?

कोलकाता । पश्चिम बंगाल विधानसभा निर्वाचनको मतगणना जारी रहँदा प्रारम्भिक रुझानमा भारतीय जनता पार्टी (भाजपा) ले सत्तारुढ तृणमूल कांग्रेस (टीएमसी) लाई पछि पार्दै अग्रता कायम गरेको छ।

विशेषगरी चुनावी प्रचारका क्रममा प्रधानमन्त्री नरेन्द्र मोदीले झालमुरी खाएर चर्चामा आएको झारग्राम सिटमा भाजपाले बलियो पकड जमाएको देखिएको छ। अहिलेको ताजा अवस्था अनुसार झारग्राममा भाजपाका उम्मेदवार लक्ष्मी कान्त साव २९ हजार ८ सय ८२ मतका साथ अग्रस्थानमा छन्।

भाजपा उम्मेदवार सावले आफ्ना निकटतम प्रतिद्वन्द्वी तृणमूल कांग्रेसका मंगल सारेनलाई करिब ८ हजार मतको अन्तरले पछि पारेका छन्। प्रधानमन्त्री मोदीले यस क्षेत्रमा गरेको चुनावी सभा र स्थानीयस्तरमा देखाएको सामीप्यताले भाजपाको पक्षमा जनमत सिर्जना गर्न मद्दत पुगेको राजनीतिक विश्लेषकहरूले अनुमान गरेका छन्।

यद्यपि, यो प्रारम्भिक नतिजा मात्रै भएको र मतगणनाका धेरै चरणहरू अझै बाँकी रहेकाले अन्तिम परिणाम आउन समय लाग्नेछ। मतगणनाको चरणहरू अघि बढ्दै जाँदा यो अग्रतामा फेरबदल हुन सक्ने सम्भावना पनि उत्तिकै छ।

पश्चिम बंगालका कुल २९४ सिटहरूका लागि गत अप्रिल २३ र २९ मा मतदान सम्पन्न भएको थियो। तर, केही प्राविधिक र सुरक्षाका कारण फाल्टा निर्वाचन क्षेत्रमा भने मे २१ मा पुन: मतदान हुने तय भएको छ। अहिले राज्यभरिको ध्यान मतगणनामा केन्द्रित छ, जहाँ भाजपा र तृणमूल कांग्रेसबीच कडा प्रतिस्पर्धा देखिएको छ।

यदि प्रारम्भिक रुझान नै अन्तिम नतिजामा बदलिए झारग्राममा भाजपाको जित सुनिश्चित हुने देखिएको छ।