चिडियाखानामा पनि भेटियो बर्डफ्लु, अनिश्चितकालका लागि बन्द
काठमाडौं । ललितपुरको जावलाखेलस्थित सदर चिडियाखाना परिसरभित्र रहेका जीवजन्तुमा बर्डफ्लु पुष्टि भएको छ ।
बर्डफ्लु पुष्टि भएपछि राष्ट्रिय प्रकृति संरक्षण कोषले सञ्चालन गर्दै आइरहेको सदर चिडियाखानाले सूचना जारी गर्दै आजदेखि अनिश्चितकालका लागि बन्द गरिएको जानकारी दिएको छ ।
चिडियाखानाका अनुसार संक्रमण थप फैलिन नदिन र आगन्तुकहरूको सुरक्षा सुनिश्चित गर्नका लागि आजदेखि नै लागु हुने गरी चिडियाखानाका सम्पूर्ण गतिविधिहरू स्थगित गरिएको छ ।
गत चैतमा कोशी प्रदेशमा देखिएको बर्डफ्लु संक्रमण अहिलेसम्म काठमाडौं उपत्यकासहित १० जिल्लामा फैलिसकेको छ ।
यस विषयमा सांसदहरुले प्रतिनिधिसभा बैठकमा समेत सरकारको ध्यानाकर्षण गराएका छन् ।
प्रकाशित मिति: ५ असार २०८३, शुक्रबार
