नेपाल-भारत सम्बन्ध अझै बलियो बनाउनुपर्छ’ : न्यायाधीश चन्द्र शेखर

काठमाडौँ। भारतको सर्वोच्च अदालतका न्यायाधीश चन्द्र शेखरले नेपाल र भारतको धार्मिक एवम् सांस्कृतिक सम्बन्ध अझै प्रगाढ बनाउनुपर्ने बताएका छन्।

पशुपतिनाथ मन्दिरको दर्शनपछि उनले दुई देशबिच प्राचीनकादेखि रहँदै आएको सम्बन्धलाई द्विपक्षीय हित र साझेदारीमार्फत अझै बलियो बनाउनुपर्ने बताएका हुन्।

उनले पशुपतिनाथ मन्दिरको दर्शन गर्न सहज भएको भन्दै खुसी व्यक्त गरे। पशुपति क्षेत्र विकास कोषका पूर्वसदस्यसचिव डा. मिलनकुमार थापाको निमन्त्रणामा न्यायाधीश चन्द्र शेखर काठमाडौँ आएका हुन्। उनलाई पशुपति क्षेत्र विकास कोष सञ्चालक परिषद्का सदस्यद्वय रूपा शाही बास्तोला, रामशोभित नायक तथा महन्थ स्वामी गोकुलानन्दलगायतले स्वागत गरे।

डा। थापाले नेपाल र भारतबिचको ऐतिहासिक-सांस्कृतिक सम्बन्धलाई प्रगाढ बनाउँदै धार्मिक पर्यटनमार्फत आर्थिक विकासका पक्षमा काम गर्न भारतमा ‘पशुपति दर्शन अभियान’ सञ्चालन गरिएको र सोही अभियानअन्तर्गत कलाकार, राजनीतिज्ञ, खेलाडी तथा न्यायाधीशलगायतका क्षेत्रका अगुवाहरू पशुपति दर्शनका लागि काठमाडौँ आइरहेको जानकारी दिए।