इजरायलमा स्वस्थानी व्रतको साङ्गे भोलि, यस्तो छ भव्य तयारी



इजरायल, माघ १८
पौष शुक्ल पूर्णिमादेखि सुरु भएको स्वस्थानी व्रतको इजरायलमा भोलि मात्रै समापन हुने भएको छ । स्वस्थानी व्रत साङ्गेको लागि सम्पूर्ण तयारी पूरा भएको आयोजक ओम जनजागरण अभियान इजरायलले जनाएको छ ।

धार्मिक परम्पराअनुसार स्वस्थानी व्रतको हिजो समापन हुने तिथि रहेको भएपनि परदेशीभूमिमा बिविध कारणले दुई दिन ढिलो गरी स्वस्थानी व्रतको साङ्गे गर्न लागेको ओम जनजागरण अभियान इजरायलकी सचिव दीया चापागाईंले बताइन् ।

कार्यक्रम साझ साढे ६ बजे इजरायलको तेलअभिवमा विशेष पूजाआजा र प्रसादग्रहण सहित भब्यरुपमा स्वस्थानी व्रतको साङ्गे गरिने छ ।

स्वस्थानी व्रतको साङ्गेका लागि नेपालबाट ख्यातिप्राप्त भागवत वाचक तथा राष्ट्रिय धर्मानुष्ठान विभाग (विश्वहिन्दू परिषद नेपाल) प्रमुख गुरुवाआचार्य बिष्णुप्रसाद ज्ञवाली बुधबार इजरायल पुगिसकेको ओम जनजागरण अभियान इजरायलका उपाध्यक्ष भक्तिप्रसाद सापकोटाले बताए ।

हिन्दू धर्मालम्बीहरुको बिशेष धार्मिक पर्व स्वस्थानी ब्रतकथा तथा महाशिवरात्रीको अवसरमा आयोजना गरिन लागेको सो कार्यक्रममा भक्तालुजनलगायत सम्पूर्ण नेपालीलार्ई उपस्थित भई प्रसादग्रहण गरिदिन हुन सचिव चापागाईंले आग्रह गरेकी छन् ।

विशेषगरी महिलाहरुले बस्ने स्वस्थानी व्रतमा महिनाभर बसेको व्रतको विसर्जन गरी व्रतालुहरुले माघ स्नान गरी स्वस्थानी माताको प्रसादग्रहण गर्ने धार्मिक परम्परा रहेको छ ।

यो व्रत पौष शुक्ल चतुर्दशीको दिन हात गोडाका नङ काटी स्नान गरी शुद्ध वस्त्र पहिरिएर यसको सुरुवात हुन्छ र त्यसपछि हरेक बेलुकी स्कन्द पुराणको केदार खण्डअन्तर्गत माघ माहात्म्यको कुमार अगस्त्यबीच संवाद भएको स्वस्थानी व्रतकथा सुन्ने, सुनाउने परम्परा रहेको छ ।

एक महिनासम्म यो विधिबाट व्रत गरी माघ शुक्ल पूर्णिमाका दिन १०८ जनै, १०८ सुपारी, १०८ पान, १०८ फूल, १०८ रोटी, १०८ अक्षता विभिन्न फलफूल, धूप, बत्ती, नैवेद्य, श्रीखण्ड, रक्तचन्दन, सिन्दूर, वस्त्र, भेटी चढाई व्रतको कामना पूर्ण होस् भनी भगवतीलाई अघ्र्य दिने चलन छ ।

उपाध्यक्ष सापकोटाले कार्यक्रम कसैका बिरुद्ध नभई बैदिक सनातन धर्मको प्रचारप्रसार र संरक्षण गर्ने उद्देश्यका साथ श्री स्वस्थानी ब्रतको साङ्गे तथा महाशिवरात्रीको अवसरमा विशेष पूजाआजा र प्रसादग्रहण कार्यक्रम राखिएको जानकारी दिए ।

उनले शनिबार गुरुआचार्य ज्ञवालीसहितको टोलीलाई इजरायलको रमणीयस्थल मृतसागर (डेड सी) का साथै अन्य पर्यटकीय स्थलको भ्रमण गर्ने कार्यक्रमसमेत रहेकोे जानकारी दिए ।

प्रतिक्रिया दिनुहोस्
           
सामाजिक संजालमा हामी
सूचना विभाग, दर्ता प्रमाणपत्र नं. ३८६/०७३-७४
सम्पर्क
देशको मिडिया प्रा.लि. काठमाडौँ, नेपाल
इमेलः [email protected]
फोन : ०१-४१०७६६६
           
संस्थापक / प्रधान सम्पादक : ध्रुब सुबेदी
     
           
facebook
© 2022 Deshko News