काठमाडौं, कात्तिक १८

रौतहटमा स्यालको टोकाइबाट ज्यान गुमाएकालाई शहिद घोषणा गर्न माग गर्दै चक्काजाम गरिएको छ ।

गरुडा नगरपालिकाका एक जना शिक्षकको स्यालको टोकाइबाट ज्यान गएकाले उनलाई शहिद घोषणा गर्न र अन्य डेढ दर्जन घाइतेहरुलाई उपचारको माग गर्दै रौतहटको व्यापारिक केन्द्र गरुडामा बिहिबार बिहान ९ बजे देखि १२ बजे सम्म तीन घण्टा चक्काजाम गरिएको हो ।

पिडितपक्ष र स्थानीय प्रशासनबिच मृतकलाई सहिद घोषणा गर्नेबाहेक डेढ दर्जन घाईतेलाई थप उपचारका लागि आजै एम्बुलेन्सबाट काठमाण्डौ पठाउने सहमति भएपछि चक्काजाम खुलाइएको बैठकमा सहभागी एसपी गणेश रेग्मीले जानकारी दिए ।

उनका अनुसार असोज दोस्रो साता स्यालको टोकाइबाट गरुडा नगरपालिका ३ महमदपुरका शिक्षक बसन्त यादवको ज्यान जानुका साथै विभिन्न स्थानमा अन्य २५ जना घाइते भएकाले चक्काजाम गरेको हो ।
घरमा चर्पी नभएपछि दिशा गर्न बाहिर गएका बेला उनीहरुलाई स्यालले टोकेको हो ।