कञ्चनपुरमा छाउगोठ भत्काउने अभियान
कञ्चनपुर, असार ३१ । कञ्चनपुरका नौवटै स्थानीय तहमा छाउगोठ भत्काउन विशेष अभियान सञ्चालन हुने भएको छ ।
जिल्ला प्रशासन कार्यालयले स्थानीय तहलाई छाउगोठ भत्काउन पत्राचार गरेको हो ।
‘छाउगोठ भत्काई परम्परागत रूपमा चलिरहेको कु–प्रथा उन्मूलन गर्न पालिकाबाट आवश्यक निर्णय गरी कार्यान्वयन गर्न अभियान सञ्चालन गरिएको छ,’ प्रमुख जिल्ला अधिकारी लक्ष्मण ढकालद्वारा हस्ताक्षरित पत्रमा भनिएको छ ।
पत्रमा सामाजिक कु–प्रथा अन्त्य गर्न छाउगोठ भत्काउने अभियान सञ्चालन गर्न गराउन अनुरोध गरिएको छ ।
तीन दिनअघि कृष्णपुर नगरपालिका–१, निगाली टोलमा महिनावारीका समयमा छाउगोठमा बसिरहेकी २८ वर्षीया कमला दमाईंको सर्पदंशबाट निधन भएको थियो । त्यही घटनापछि जिल्ला प्रशासन कार्यालयले छाउगोठ भत्काउनका लागि विशेष अभियान सञ्चालन गर्न निर्देशन दिएको हो ।
प्रकाशित मिति: ३१ असार २०८२, मंगलबार
