इटली पुगेकी गाजाकी कुपोषित महिलाको मृत्यु
रोम । उपचारका लागि इटली पुगेकी गाजाकी एक महिलाको निधन भएको छ । २० वर्षकी ती महिलाको उपचारको क्रममा मृत्यु भएको हो ।
मृत्यु हुनेमा मराह अबु जुह्री भएको बताइएको छ । बुधबार रातिको उडानबाट उनी आफ्नो आमाको साथमा इटली सरकारको योजनाअन्तर्गत उपचारका लागि पिसा पुगेकी थइन् ।
जुह्रीलाई कार्डियाक अरेस्ट भएको अनि इटली आइपुगेको ४८ घण्टा पनि नपुग्दै उनको मृत्यु भएको युनिभर्सिटी हस्पिटल अफ पिसाले भनेको छ ।
कुपोषणका कारण महिलाको तौल र मांसपेशी निकै घटेको अस्पतालले भनेको छ । उनी चरम कुपोषणबाट ग्रसित रहेको बताइएको छ । संयुक्त राष्ट्रसङ्घ (युएन)ले बारम्बार गाजामा कुपोषण फैलिएको चेतावनी दिइरहेको छ ।
गएको महिना मात्रै युएन समर्थित विज्ञहरूले गाजा भोकमरीको चरम अवस्थामा रहेको चेतावनी दिएका थिए । तर इजरायलले भने गाजामा भोकमरी छ भन्ने कुरा अस्वीकार गर्दै आएको छ । बरु युएन एजेन्सीहरूले नै सीमामा सहायता सामग्री नउठाएको अनि गाजाबासीलाई यी सामान नदिएको आरोप लगाइरहेको छ ।
इजरायलले गाजामा युद्ध सुरु गरेयता इटलीमा १८० भन्दा धेरै बालबालिका र वयस्क ल्याइएको छ । यो हप्ता मात्रै रोम, मिलान र पिसामा ३१ जना बिरामी र तिनका साथी आइपुगेका थिए ।
प्रकाशित मिति: १ भदौ २०८२, आइतबार
