भारतको संसद् परिसरमा युवकको अनधिकृत प्रवेश, सुरक्षाकर्मीले नियन्त्रणमा लिए

काठमाडौँ । शुक्रबार बिहान भारतको संसद् परिसरमा एक युवक पर्खाल नाघेर भित्र पसेको घटना सार्वजनिक भएको छ ।

समाचार एजेन्सी एएनआईका अनुसार, युवक गरुड द्वारतर्फ पुगेका थिए तर तुरुन्तै सीआईएसएफ सुरक्षाकर्मीहरूले उनलाई नियन्त्रणमा लिएका थिए । प्रहरीका अनुसार युवकको पहिचान उत्तर प्रदेश निवासी रामका रूपमा गरिएको छ, जो मानसिक रूपमा अस्वस्थ रहेको पाइएको छ ।

पीटीआईको रिपोर्टअनुसार, घटना बिहान ६:३० बजे भएको हो । सो समयमा संसद्को मनसुन अधिवेशन सकिसकेकोले त्यहाँ कुनै पनि सांसद उपस्थित थिएनन् ।

यसअघि पनि संसद् भवनमा आक्रमण र सुरक्षा उल्लङ्घनका घटना भएका थिए । सन् २००१ को डिसेम्बर १३ मा लस्कर–ए–तैयबा र जैश–ए–मोहम्मदका अतिवादीहरूले संसद् भवनमा आक्रमण गर्दा पाँच अतिवादीसहित १४ जनाको मृत्यु भएको थियो ।

त्यस्तै, सन् २०२३ को डिसेम्बर १३ मा लोकसभा कक्षमा शून्य समयमा दुई युवाले आगन्तुक ग्यालरीबाट हाम फालेर पहेँलो ग्यास छाड्दै सरकार विरोधी नारा लगाएका थिए । उक्त घटनामा प्रहरीले ६ जनालाई पक्राउ गरेको थियो ।