नेदरल्यान्डमा उग्र बन्यो आप्रवासन विरोधी प्रदर्शन
हेग । नेदरल्यान्डमा आप्रवासनको विरोधमा भएको प्रदर्शनले उग्ररुप लिएको छ । शुक्रबार प्रदर्शनकारीहरूलाई तितर–बितर पार्न डच प्रहरीले अश्रु ग्यास र पानीको फोहोराको प्रयोग गरेको थियो । प्रदर्शनका क्रममा ३० जनालाई पक्राउ गरिएको छ ।
प्रदर्शनकारीहरूले ढुङ्गा र बोतल प्रहार गर्दा दुई अधिकारी घाइते भएको बताइएको छ । झन्डै १ हजार ५०० मानिसहरूले सहर छिर्ने राजमार्ग बन्द गरेका थिए ।
प्रहरीको एउटा गाडी आगो लगाइएको पनि डच समाचार एजेन्सी एएनपीले भनेको छ । प्रधानमन्त्री डिक स्खफले पछिल्लो घटनालाई स्तब्ध पार्ने खालको अनि निर्लज्ज हिंसा भनेका छन् । यसलाई उनले पूर्णतः अस्वीकार्य बताए ।
अध्यागमन नीति कठोर पार्नुपर्ने अनि आश्रय माग्नेहरूमाथि कडाइ गर्नुपर्ने मागसहित दक्षिणपन्थी कार्यकर्ताहरूले विरोध प्रदर्शन आयोजना गरेका थिए ।
डच झन्डा र अति–दक्षिणपन्थी समूहहरूसँग सम्बन्धित झन्डाहरू फहराउँदै प्रदर्शनकारीहरूको ठुलो समूह सुरक्षा बलको सामुन्ने गएपछि हिंसा भड्किएको बताइएको छ ।
प्रकाशित मिति: ५ आश्विन २०८२, आइतबार
