पारस खड्काको टिमले जित्यो धनगढी प्रिमियर लिगको उपाधि



धनगढी, वैशाख ९

कैलालीमा भएको पहिलो धनगढी प्रिमियर लिग (डीपीएल) क्रिकेटको उपाधि पारस खड्काको कप्तानीमा रहेको टिम चौराहा धनगढीले जितेको छ।

सेती अञ्चल प्रहरी कार्यालयको खेल मैदानमा भएको फाइनलमा टिम चौराहाले शरद भेष्वाकरको विराटनगर किंग्सलाई ६२ रनले पराजित गर्दै उपाधिमाथि कब्जा जमाएको हो ।

टिम चौराहाले दिएको १ सय ५९ रनको लक्ष्य पछ्याएको विराटनगर किंग्स १८ दशमलब १ ओभरमा ९७ रनमै समेटियो । विराटनगर किंग्सका लागि प्रनित थापा मगरले सर्वाधिक २६ रन जोडे।

कप्तान शरद भेष्वाकर भने २ रनमै पेभिलियन फर्केका थिए। विराटनगर किंग्सलाई सस्तैमा समेट्न टिम चौराहाका सुशन भारीले सर्वाधिक तीन विकेट लिए भने आरिफ शेख र शौरभ खनालले समान दुई–दुई विकेट लिएका थिए। यस्तै रामनरेश गिरी र ललित राजबंशीले एक–एक विकेट लिए।

यसअघि टस जितेर पहिले व्याटिङ गरेको टिम चौराहाले पुरै २० ओभरमा ५ विकेटको क्षतिमा १ सय ५९ रन बनाएको थियो। टिम चौराहाका लागि आरिफ शेखले सर्वाधिक ५४ को योगदान दिए ।

यस्तै अमर रौतेला ३१ र शौरभ खनालले अविजित १४ रन बनाए। कप्तान पारस खड्का २९ तथा पृथु बास्कोटाले १४ जोडे।

विराटनगरका लागि सुशील कँडेलले दुई विकेट लिए भने जितेन्द्र मुखिया, सन्दिप लामिछाने र प्रकाश बिष्टले समान एक–एक विकेट लिए।

धनगढी प्रिमियर लिग (डीपीएल) क्रिकेटको उपाधि उचालेको टिम चौराहाले उपाधिसँगै १५ लाख रुपैयाँ नगद पुरस्कार पाएको छ।

उपविजेतमा सीमित शरद भेष्वाकरको कप्तानीमा रहेको विराटनगर किंग्सले ७ लाख रुपैयाँमा चित्त बुझाउन बाध्य भयो।

प्रतिक्रिया दिनुहोस्
           
सामाजिक संजालमा हामी
सूचना विभाग, दर्ता प्रमाणपत्र नं. ३८६/०७३-७४
सम्पर्क
देशको मिडिया प्रा.लि. काठमाडौँ, नेपाल
इमेलः [email protected]
फोन : ०१-४१०७६६६
           
संस्थापक / प्रधान सम्पादक : ध्रुब सुबेदी
     
           
facebook
© 2022 Deshko News