ट्रम्पको धरपकडप्रति अमेरिकामा बढिरहेछ असन्तुष्टि

वासिङ्टन डीसी । अमेरिकी राष्ट्रपति डोनाल्ड ट्रम्पको आप्रवासनसम्बन्धी नीतिमा जनसमर्थन ऐतिहासिक रूपमा न्यून स्तरमा झरेको छ । आप्रवासीमाथि कडाइ गर्ने क्रममा संघीय एजेन्टद्वारा दुई जनाको हत्या भएपछि चर्किएको आलोचनाबिच ट्रम्पको स्वीकृति दर घटेको एक नयाँ सर्वेक्षणले देखाएको हो ।

सोमबार सार्वजनिक भएको रोयटर्स/इप्सोसको सर्वेक्षणअनुसार केवल ३९ प्रतिशत अमेरिकीले आप्रवासन मुद्दामा ट्रम्पको कामप्रति समर्थन जनाएका छन् । यो दर यसै महिनाको सुरुवातमा रहेको ४१ प्रतिशतभन्दा कम हो । सर्वेक्षण शुक्रबारदेखि आइतबारसम्म गरिएको थियो ।

यो सर्वेक्षण मिनेसोटाको मिनियापोलिसमा संघीय सीमा एजेन्टले ३७ वर्षीय आईसीयू नर्स एलेक्स प्रेट्टीलाई गोली हानी हत्या गरेको घटनापछि आएको हो । प्रेट्टी पछिल्लो एक महिनाभित्र सो शहरमा संघीय एजेन्टद्वारा मारिने दोस्रो व्यक्ति हुन् ।

यसअघि जनवरी ७ मा आप्रवासन तथा भन्सार प्रवर्तन (आईसीई) एजेन्टले तीन सन्तानकी आमा ३७ वर्षीया रेनी निकोल गुडको हत्या गरेका थिए ।

बढ्दो आलोचनाबिच ट्रम्पले सोमबार आफ्ना ‘सीमा जार’ टम होमनलाई मिनियापोलिस पठाउने घोषणा गरेका छन् । साथै उनले मिनेसोटाका डेमोक्रेटिक गभर्नर टिम वाल्जसँगको फोनवार्ता धेरै राम्रो भएको भन्दै प्रशासन र राज्य सरकारबीच समन्वय बढ्ने सङ्केत दिएका छन् । सर्वेक्षणमा ५८ प्रतिशत उत्तरदाताले आईसीई एजेन्टहरूले आप्रवासन कडाइमा अत्यधिक कदम चालेको बताएका छन् ।

२६ प्रतिशतले ठिकै भनेका छन् भने १२ प्रतिशतले अझ कडा हुनुपर्ने धारणा राखेका छन् । न्युयोर्क टाइम्सरसिएना र वाल स्ट्रिट जर्नलका अघिल्ला सर्वेक्षणहरूले पनि ट्रम्प प्रशासनको आप्रवासन नीति जनतामा अलोकप्रिय बन्दै गएको सङ्केत गरेका छन् ।