रोहित शेट्टीको घरबाहिर चार राउन्ड फायरिङ, बलिउडमा पुनः त्रास

मुम्बई । बलिउडका चर्चित एक्सन फिल्म निर्देशक रोहित शेट्टीको मुम्बईस्थित घरबाहिर शनिबार राति गोली चलेको छ। जुहु क्षेत्रमा रहेको उनको निवासबाहिर अज्ञात समूहले चार राउन्ड फायरिङ गरेपछि बलिउड क्षेत्रमा पुनः त्रास फैलिएको छ।

घटनाको जानकारी पाउनेबित्तिकै मुम्बई प्रहरी र फरेन्सिक टोली घटनास्थल पुगेर अनुसन्धान सुरु गरेका छन्। प्रहरीका अनुसार यो घटना शनिबार राति करिब ३ बजे भएको हो। अज्ञात आक्रमणकारीले गोली चलाएर फरार भएपछि अहिले शेट्टीको घर र जुहु क्षेत्रमा सुरक्षा व्यवस्था कडा पारिएको छ।

यो क्षेत्रमा बलिउडका अन्य धेरै सेलिब्रिटीहरूको समेत बसोबास छ। अहिलेसम्म कुनै पनि समूहले यस आक्रमणको जिम्मेवारी लिएको छैन र आक्रमणको उद्देश्य पनि खुल्न सकेको छैन। प्रहरीले आक्रमणकारीको पहिचानका लागि नजिकैका सीसीटीभी फुटेजहरू संकलन गरिरहेको छ।

बलिउड सेलिब्रिटीहरूलाई लक्षित गरी भएका यस्ता घटना यो पहिलो भने होइन। यसअघि कमेडियन तथा अभिनेता कपिल शर्माको क्यानडास्थित क्याफेमा तीन पटक गोली प्रहार भइसकेको छ। लरेन्स बिश्नोई ग्याङले सो आक्रमणको जिम्मेवारी लिँदै कपिललाई धम्की समेत दिएको थियो।

यस्तै, अभिनेता सलमान खानलाई पनि पटक-पटक ज्यान मार्ने धम्की आइरहेको छ। गत अप्रिलमा मुम्बईको वर्लीस्थित यातायात विभागमा अज्ञात व्यक्तिले ह्वाट्सएप म्यासेज पठाएर सलमानको कारलाई बमले उडाइदिने र घरमै छिरेर मार्ने धम्की दिएका थिए।

सन् २०२४ अप्रिल १४ मा सलमानको ग्यालेक्सी अपार्टमेन्टमा पनि गोली चलेको थियो, जसको जिम्मेवारी लरेन्स ग्याङले नै लिएको थियो।