भेनेजुएलाका दक्षिणपन्थी अभियन्ता जेवियर ताराजोना हिरासतमुक्त

काराकास । भेनेजुएलामा दक्षिणपन्थी अभियन्ता जेवियर ताराजोना रिहा भएका छन् । ४ वर्ष ७ महिना जेलमा बिताएपछि उनी रिहा भएको उनका परिवार र अधिकारकर्मीहरूले बताएका हुन् । ताराजोना मानवअधिकार समूह फनडारिडिसका निर्देशक हुन् ।

१ हजार ६७५ दिन जेलमा बिताएपछि राजधानी काराकासस्थित होलिकोइड कारागारबाट ताराजोनालाई रिहा गरिएको हो । ‘एक व्यक्तिको स्वतन्त्रता सबैको आशा हो’ उनका दाजु जोस राफाएल ताराजोनाले माइक्रो ब्लगिङ वेबसाइट एक्समा भाइको रिहाइको खबर सेयर गर्दै लेखेका छन् ।

अधिकार संस्था फोरो पेनलका अनुसार हालै ताराजोनासँगै ३० भन्दा बढी राजनीतिक बन्दी छुटेका छन् । भेनेजुएली राष्ट्रपति निकोलस मादुरो पक्राउ परेयता ३०० भन्दा बढी रिहा भइसकेका भए पनि ७०० भन्दा धेरै राजनीतिक कैदीहरू अझै जेलमै रहेको बताइएको छ ।

सरकारले राजनीतिक कैदी नराखेको दाबी गर्दै आएको छ । तर आलोचकहरू यसलाई अस्वीकार्य आपराधिक आरोप भन्दै आएका छन् । यी रिहाइहरू भेनेजुएलाको अन्तरिम राष्ट्रपति डेल्सी रोड्रिगेजद्वारा प्रस्तावित आममाफी विधेयक र राजनीतिक बन्दीहरूलाई छोड्ने कदमको हिस्साको रूपमा आएको बताइएको छ ।