अमेरिकाले इरानमा रहेका आफ्ना नागरिकका लागि जारी गर्यो सुरक्षा चेतावनी
वासिङ्टन डीसी । इरानमा रहेको अमेरिकी भर्चुअल दूतावासले अमेरिकी नागरिकहरूका लागि सुरक्षा चेतावनी जारी गरेको छ । इरानमा सडक बन्द, सार्वजनिक यातायात र इन्टरनेट अवरोधहरू जारी रहेको भन्दै दूतावासले सुरक्षा चेतावनी जारी गरेको हो ।
‘इरानी सरकारले मोबाइल, ल्यान्डलाइन र राष्ट्रिय इन्टरनेट नेटवर्कहरूमा पहुँच प्रतिबन्धित गर्न जारी राखेको छ । एयरलाइन्सहरूले इरानबाट बाहिरिने र त्यसतर्फ जाने उडानहरू सीमित वा रद्द गरिरहेका छन्’ दूतावासद्वारा जारी विज्ञप्तिमा भनिएको छ ।
विज्ञप्तिमा अमेरिकी नागरिकहरूलाई सञ्चारका वैकल्पिक माध्यमहरूबारे विचार गर्न र सुरक्षित छ भने आर्मेनिया वा टर्की हुँदै इरान छोड्ने विचार गर्न सल्लाह दिइएको छ । इरान र अमेरिका बिचको आणविक वार्ता शुक्रबार ओमानमा हुने तय भएकै समयमा यो चेतावनी आएको हो ।
इरानले आफ्नो आणविक कार्यक्रम सीमित गर्न नयाँ सम्झौता नगरेसम्म इरानविरुद्ध सैन्य कारबाही गर्ने धम्की अमेरिकी राष्ट्रपति डोनाल्ड ट्रम्पले दिइरहेका छन् । आफू आणविक मुद्दामा कुरा गर्न तयार रहेको तर आफ्नो क्षेप्यास्त्र कार्यक्रम सीमित गर्ने जस्ता मागहरूमा कुरा नगर्ने इरानको अडान छ ।
प्रकाशित मिति: २३ माघ २०८२, शुक्रबार
