भारत भ्रमणमा रहेका मार्क कार्नीले भेटे नरेन्द्र मोदीलाई

नयाँ दिल्ली । सम्बन्ध सुधार्ने उद्देश्यसहित क्यानडाका प्रधानमन्त्री मार्क कार्नीले भारत भ्रमण गरेका छन् । नयाँ दिल्लीस्थित हैदराबाद हाउसमा उनले भारतीय प्रधानमन्त्री नरेन्द्र मोदीसँग भेटवार्ता गरेका हुन् । चार दिने भारत भ्रमणमा रहेका कार्नीले फेब्रुअरी २८ मा मुम्बईबाट आफ्नो यात्रा सुरु गर्दै दिल्ली पुगेका हुन् । भेटअघि उनले भारतका विदेशमन्त्री एस जयशंकरसँग पनि छलफल गरेका थिए ।

कार्नीले सामाजिक सञ्जाल एक्समा लेख्दै भने, ‘टिम क्यानडा एउटा महत्त्वपूर्ण मिसनमा यहाँ छ । मुम्बईमा हामीले बलियो र लचिलो क्यानडेली अर्थतन्त्र निर्माणका लागि भारतसँग व्यापार दोब्बर बनाउने, ऊर्जा साझेदारी सुरक्षित गर्ने र ठुलो लगानी आकर्षित गर्ने विषयमा काम गर्याै ।’

दुवै नेताबिचको भेटपछि संयुक्त रूपमा पत्रकारसमक्ष वक्तव्य दिने कार्यक्रम तय गरिएको छ । दिल्लीको हैदराबाद हाउसमा बिहान करिब १०ः३० बजे दुई नेताबिच औपचारिक वार्ता सुरु भएको थियो । यस भ्रमणको मुख्य उपलब्धि क्यानडा र भारतबिच हुने भनिएको १० वर्षे युरेनियम आपूर्ति सम्झौता हुने मानिएको छ । करिब ३ अर्ब डलर बराबरको यो सम्झौता भएमा क्यानडालाई ऊर्जा शक्तिराष्ट्र बनाउने कार्नीको रणनीतिमा ठुलो सफलता मानिनेछ ।

विश्वको दोस्रो ठुलो युरेनियम उत्पादक क्यानडाले २०१३ मा लागू भएको आणविक सहकार्य सम्झौतापछि भारतलाई युरेनियम आपूर्ति गर्दै आएको छ । आफ्नो विस्तार हुँदै गएको आणविक ऊर्जा क्षेत्रमा इन्धन सुनिश्चित गर्न भारत थप युरेनियम किन्न इच्छुक रहेको बताइएको छ ।