विज्ञापन प्रसारणअघि बोर्डको अनुमति अनिवार्य: विज्ञापन बोर्ड

काठमाडौँ । विज्ञापन बोर्डले मुलुकभित्र प्रसारण हुने सबै श्रव्य, दृश्य तथा श्रव्यदृश्य विज्ञापन सामग्री प्रसारण गर्नुअघि अनिवार्य रूपमा बोर्डबाट परीक्षण गराई अनुमति लिनुपर्ने जनाएको छ।

बोर्डले आइतबार सूचना जारी गर्दै बोर्डको स्वीकृति नलिई विभिन्न सञ्चारमाध्यमबाट विज्ञापन प्रसारण भइरहेको पाइएको जनाएको छ। विज्ञापनमा विज्ञापनकर्ताको नाम, ठेगाना, चेतावनीमूलक सन्देशलगायत अनिवार्य विवरण उल्लेख नगरिएको र तथ्यहीन, अतिरञ्जित तथा उपभोक्तालाई भ्रममा पार्ने सामग्रीसमेत प्रसारण भइरहेको उल्लेख गरेको छ।

विज्ञापन (नियमन गर्ने) ऐन, २०७६ को दफा १५ (ख), विज्ञापन (नियमन गर्ने) नियमावली, २०७७ को नियम ५ तथा विज्ञापन प्रसारण सामग्री परीक्षणसम्बन्धी मापदण्ड, २०७८ (पहिलो संशोधन २०८०) अनुसार विज्ञापन सामग्री परीक्षण तथा अनुमति दिने अधिकार विज्ञापन बोर्डमा रहेको बोर्डले जनाएको छ।

नेपालमा प्रसारण हुने सबै श्रव्य, दृश्य तथा श्रव्यदृश्य विज्ञापन सामग्री प्रसारणअघि अनिवार्य रूपमा परीक्षण गराई अनुमति लिन बोर्डले सम्बन्धित पक्षलाई निर्देशन दिएको छ। हालसम्म परीक्षण नगराई प्रसारण भइरहेका विज्ञापन सामग्रीसमेत तत्काल परीक्षण गराई कानुनी प्रक्रिया पूरा गर्न बोर्डले आग्रह गरेको छ।

प्रचलित कानुनविपरीत रहेका विज्ञापन सामग्री तत्काल हटाउन बोर्डले निर्देशन दिएको छ। कानुनी व्यवस्था उल्लङ्घन गरी विज्ञापन प्रसारण गरेको पाइएमा प्रचलित कानुनबमोजिम कारबाही गरिने बोर्डले जनाएको छ।