काठमाडौं , मंसिर १४

सरकार र आमरण अनशनरत डा. गोविन्द केसीका प्रतिनिधिबीचको वार्ता निष्कर्षमा नपुग्दा डा. केसीको स्वास्थ्य अवस्था जटिल बन्दै गएको छ ।

यद्यपि, सरकार र अनशनरत डा. केसीका प्रतिनिधिबीच आज पनि वार्ता हुँदैछ । सरकारले गठन गरेको वार्ता टोलीले लगातारजसो डा. केसीका प्रतिनिधिसँग वार्ता गरिरहेपनि निष्कर्ष भने निस्किएको छैन ।

त्रिविका उपकुलपति डा. तीर्थ खनियाँ र चिकित्साशास्त्र अध्ययन संस्थान आइओएमका डिन डा. केपी सिंहलाई बर्खास्त गर्नुपर्ने डा. केसीको मागमा पुगेर विषय अड्किएको छ ।

सरकारी टोलीले उनीहरुलाई हटाउन नसकिने अडान राखेको छ भने डा. केसी उक्त माग पूरा नभएसम्म अनशन फिर्ता नलिने अड्डीमा छन् ।

वरिष्ठताका आधारमा डिन नियुक्तिसँगै चिकित्सा शिक्षा र चिकित्सा सेवासम्बन्धी विभिन्न माग राख्दै डा. केसी १७ औं दिनदेखि अनशनमा छन् ।

वार्तामा संलग्न शिक्षा सचिव शान्तबहादुर श्रेष्ठले डा. केसीको स्वास्थ्य अवस्था बिग्रदै गएकाले आफूहरु संवेदलनशील भएको बताएको भएपनि निकास अझै आउन नसकेको हो ।

सरकार भने अहिले डिनमा नियुक्त भएका डा. केपी सिंहको राजिनामाभन्दा सुधार प्रणालीको कार्ययोजना बनाई आगामी दिनमा लागु गर्ने पक्षमा देखिएको छ ।

प्रकाशित मिति: १४ मंसिर २०७३, मंगलबार