काठमाडौं, मंसिर १६

प्रमुख प्रतिपक्षी दल नेकपा एमालेले संविधान संशोधन विधेयकको विरोध गर्दै व्यवस्थापिका–संसद बैठक अवरुद्ध गरेको छ ।

विहीबार संसद बैठक सुरु भएलगत्तै विशेष समय लिएर बोल्दै नेकपा एमालेका उपाध्यक्ष बामदेव गौतमले संविधान संशोधन विधेयकको विरोध गरे ।

उनले सरकारसँग संविधान संशोधन गर्ने नैतिक र संवैधानिक आधार नभएको जिकिर गरे ।

मधेस र पहाड छुट्याउने गरी ल्याइएको संशोधन नेपालीको हितमा नहुने भन्दै उनले संशोधन विधेयकविरुद्ध जारी विरोध प्रदर्शनहरुमा एमालेको साथ रहने पनि स्पस्ट पारे ।

जनभावनालाई कुल्चिने गरी, संविधानविपरीत हचुवाको भरमा संविधान संशोधन प्रस्ताव ल्याउने प्रधानमन्त्री पदमा बसिरहन नमिल्ने उनको भनाइ थियो ।

एमालेको अवरोधपछि संसद बैठक शुक्रबार (भोलि) दिउँसो ३ बजे बस्ने गरी स्थगित गरिएको छ ।

प्रकाशित मिति: १६ मंसिर २०७३, बिहिबार