इटहरी, पुस २३
संगीत साधना प्रतिष्ठान, इटहरीको अध्यक्षमा संगीतकार तथा गायक राम धामी चयन भएका छन् । शुक्रबार सम्पन्न प्रतिष्ठानको साधरणसभाले नेपाल संगीत तथा नाट्य प्रज्ञा प्रतिष्ठानका प्राज्ञसभा सदस्यसमेत रहेका धामीलाई सर्वसम्मत रुपमा अध्यक्ष चयन गरेको हो ।

यस्तै प्रतिष्ठानको उपाध्यक्षमा राम खडका, महासचिवमा राजु केसी, सचिवमा मोहन तिम्सिना र कोषाध्यक्ष नवीन श्रेष्ठ चयन भएका छन् । यसैगरी साधारणसभाले सदस्यहरुमा टीका लिम्बू, सुजाता बिष्ट, रोशन रानामगर, खुवेन्द्र श्रेष्ठ, श्री पोखरेल र बलराम समाललाई चयन गरेको छ ।

नवनिर्वाचित अध्यक्ष धामीले ‘नेपाली संगीतको खोज, अन्वेषण एवं संगीत शिक्षालय, सांस्कृतिक सम्पदा संग्रहालयका साथै संगीतगृहको निर्माण कार्यलाई प्रमुख महत्व दिने’ बताए । प्रतिष्ठानले इटहरीमा सुविधा सम्पन्न आफ्नै भवन निर्माण गरिरहेको छ ।