दुर्गा प्रसाईको कार्यक्रममा तनावै तनाव, शान्त छ भृकुटीमण्डप
काठमाडौं । आज राजधानीमा गणतन्त्र पक्षधर समाजवादी मोर्चा र राजतन्त्र पक्षधर राजावादीहरुको छुट्टाछुट्टै आन्दोलन जारी छ । राजावादीहरुले काठमाडौंको तिनकुनेमा आन्दोलन गरिरहेका छन् भने भृकुटीमण्डमा नेकपा माओवादी, केन्द्रसहितको समाजवादी मोर्चाको सभा चलिरहेको छ ।
राजावादीहरुको आन्दोलन स्थाल तिनकुनेमा ढुंगामुढा, अश्रुग्यास प्रहार, लाठि चार्जदेखि आगजनी र हवाइ फायरसम्म भएको छ भने समाजवादी मोर्चाको कार्यक्रममा नेताहरुले भाषण गरिरहेका छन् । अहिले नेकपा एकीकृत समाजवादीका अध्यक्ष माधव कुमार नेपालले सम्बोधन गरिरहेका छन् ।
उता तिनकुनेमा भने महिला सशस्त्र प्रहरीको टाउको फुटेको छ भने प्रदर्शनकारीले प्रहरीको बन्दुक नै खोसेका छन् ।
राजावादी प्रदर्शन उग्र बनेपछि भीड नियन्त्रणमा लिन प्रहरीले अश्रुग्यास प्रहार गरेको थियो । प्रदर्शनकारीले सोही बन्दुक नै खोसेका हुन् ।
प्रदर्शन र सभा बिथोलिएको केहीबेरमा तीनकुनेस्थित एक घरमा आगजनी भएको छ ।
आगो निभाउन पुगेको एम्बुलेन्समाथि समेत प्रदर्शनकारीले ढुंगामुढा गरेका छन् । अहिले पनि तीनकुने क्षेत्र तनावग्रस्त बनेको छ ।
उपत्यका प्रहरी कार्यालय रानीपोखरीका एसएसपी शेखर खनालले तीनकुनेको स्थिति नियन्त्रणको प्रयास भइरहेको बताए ।
प्रकाशित मिति: १४ चैत्र २०८१, शुक्रबार
