डा. केसी र सरकारी वार्ता टोलीबीच भेट, औपचारिक वार्ता आइतबारदेखि हुने

काठमाडौँ, ९ साउन । अनशनरत डा. गोविन्द केसी र सरकारको वार्ता टोलीका सदस्य तथा शिक्षा सचिव चूडामणि पौडेलबीच शनिबार भेटघाट भएको छ।

डा. केसीका सहयोगी डा. अमृत जैसीका अनुसार शिक्षा सचिव पौडेल अस्पताल पुगेर उपचाररत डा. केसीको स्वास्थ्य अवस्थाबारे जानकारी लिनुका साथै सरकारका तर्फबाट सद्भाव व्यक्त गरेका छन्।

जैसीका अनुसार सरकारी वार्ता टोलीका अन्य सदस्य काठमाडौँ बाहिर रहेका वा व्यस्त भएकाले शनिबार औपचारिक वार्ता हुन सकेन। टोलीका बाँकी सदस्य उपस्थित भएपछि आइतबारदेखि औपचारिक वार्ता सुरु गर्ने विषयमा दुवै पक्षबीच सहमति भएको छ।

चिकित्सा शिक्षा र स्वास्थ्य क्षेत्र सुधारसम्बन्धी विभिन्न माग राख्दै डा. केसी विगत तीन दिनदेखि आमरण अनशनमा छन्।

आइतबार हुने वार्ताबाट उनका मागबारे सकारात्मक सहमति खोज्दै अनशन अन्त्यका लागि निष्कर्ष निकाल्ने अपेक्षा गरिएको छ।