म्याग्दी, फागुन २६

म्याग्दीको बेनी नगरपालिका–१३ डाँडाखेतमा रहेको बालमन्दिर आधारभुत विद्यालयमा बुधबार बेलुका भएको आगलागीबाट १० कोठे भवन जलेर नष्ट भएको छ । आगलागीबाट विद्यालयको कार्यालय, कम्प्युटर ल्याब, पुस्तकालय र कक्षाकोठामा पूर्ण रुपमा क्षति पुगेको छ ।

विद्यालयमा जडान गरिएको विद्युत सर्ट भएर आगलागी हुँदा लाखौँ मूल्य बराबरको भौतिक पूर्वाधार र कार्यालयका महत्वपूर्ण दस्तावेज जलेर नष्ट भएको शिक्षक रामप्रसाद शर्माले जानकारी दिए । भवनमा अत्याधिक काठको प्रयोग गरिएकाले आगोले भीषण रुप लिएको थियो ।

स्थानीय बासिन्दा, प्रहरी र नेपाली सेनाले झण्डै तीन घण्टापछि आगो नियन्त्रणमा लिएको बताए । कक्षा ८ सम्म पठनपाठन हुने विद्यालयमा १७४ जना बालबालिका अध्ययनरत छन् । विद्यालय भवनमा आगलागी भएपछि पठनपाठन प्रभावित हुने भएको छ ।

प्रकाशित मिति: २६ फाल्गुन २०७३, बिहिबार