जंगी अड्डामा प्रधानमन्त्री कार्की- आगामी चुनावमा एक थोपा पनि रगत नबग्नेगरी लाग्न निर्देशन

काठमाडौं । प्रधानमन्त्री सुशीला कार्कीले आगामी निर्वाचन एक थोपा रगत नबग्नेगरी काम गर्न निर्देशन दिएकी छिन् ।

नेपाली सेनाको मुख्यालय जंगी अड्डामा भएको कार्यक्रममा सम्बोधन गर्दै नेपाली सेनालाई यस्तो निर्देशन दिएकी हुन् ।

सुरक्षा संवेदनशीलताका आधारमा सबै सुरक्षा निकायहरूसँगको समन्वयात्मक र त्रुटिरहित ढंगले काम गर्न निर्देशन दिँदै प्रधानमन्त्री कार्कीले भनिन्- ‘मैले यसअघि पनि भन्दै आएको छु कि आगामी चुनावमा एक थोपा पनि रगत बग्नु हुँदैन र एक जना पनि घाइते हुनुहुँदैन ।’

साथै, उनले जेनजी आन्दोलनको क्रममा लुटिएका हातहतियारको खोजी तथा फरार अपराधी पक्रन कुनै कसर बाँकी नराखी खटिन् पनि सेनालाई आग्रह गरिन् ।

सो क्रममा नेपाली सेनाले हालको सुरक्षा अवस्था, प्रमुख चुनौती र आगामी योजनाबारे ब्रिफिङ गरेको उनको सचिवालयले जनाएको छ ।

कार्यक्रममा गृहमन्त्री ओमप्रकाश अर्याल, कानुनमन्त्री अनिलकुमार सिन्हा, मुख्यसचिव सुमनराज अर्याल, प्रधान सेनापति अशोकराज सिग्देल लगायत उच्च पदस्थहरू उपस्थित थिए ।