पार्टी फुटाउनेलाई कारबाही गर्न जनमतको माग

काठमाडौँ । जनमत पार्टीका उपाध्यक्ष वसन्त कुसवाहले आफ्नो पार्टी फुटाउनेलाई कारबाही गर्न माग गरेका छन् । सोमबार सिंहदरबारमा भएको सर्वपक्षीय छलफलमा उनले यस्तो बताएका हुन् । यद्यपि सर्वोच्चले निर्वाचन आयोगको पार्टी फुटाउने निर्णय बदर गरिसकेको छ ।

‘निष्क्रिय अध्यादेशलाई सहारा बनाएर हाम्रो पार्टी फोड्ने काम भयो’, उनले भने, ‘तपाईंहरुले हाम्रो ३०, ३५ दिनको समय वेस्ट गराइदिनुभयो त्यसको क्षतिपूर्ति के ?’

निर्वाचन आयोग आफै चुनाव घोषणा भइसकेपछि पार्टी फोड्ने काममा लागेबाटै चुनाव हुनेमा विश्वस्त हुन नसकेको कुसवाहको भनाइ छ ।

‘त्यो पार्टी विभाजन गर्ने काममा जो जो आयोगमा सामेल थिए, तिनीहरूलाई कारबाही हुनुपर्छ अनि मात्र यो सरकार र आयोग चुनावप्रति प्रतिबद्ध छ भन्नेमा जनमत पार्टी विश्वास गर्छ’, कुशवाहको भनाइ छ ।