युवाहरूले चाहेजस्तो देश निर्माण गर्ने दिशामा सरकार अग्रसर छ : प्रधानमन्त्री
काठमाडाैँ । अन्तरिम सरकारकी प्रधानमन्त्री सुशीला कार्कीले युवाहरूले चाहेजस्तो देश निर्माण गर्ने दिशामा सरकार अग्रसर रहेको बताएकी छन् ।
तमु ल्होसारका अवसरमा मंगलबार आयोजित कार्यक्रमलाई काठमाडाैँमा सम्बोधन गर्दै प्रधानमन्त्री कार्कीले यस्ताे बताएकी हुन् ।
उनले पछिल्ला दिनहरूमा देखिएका परिस्थितिबाट पाठ सिक्दै शान्तिपूर्ण, संविधानसम्मत र लोकतान्त्रिक बाटोमार्फत युवाहरूले चाहेजस्तो देश निर्माण गर्ने दिशामा अग्रसर भएको बताइन् ।
उनले यसको मुख्य आधार स्वच्छ र निष्पक्ष निर्वाचन नै भएको बताइन् । आगामी फागुन २१ गते हुन लागेको निर्वाचनको वातावरण देशभर बन्दै गएको समेत उनले बताइन् ।
राजनीतिक दलहरुका तर्फबाट उत्साहका साथ समानुपातिक निर्वाचन प्रणालीतर्फका उम्मेदवारको बन्दसूची निर्वाचन आयोगमा पेस हुनुले पनि निर्वाचन सम्पन्न गर्ने दिशामा नयाँ कोशेढुंगा पार गरिएको बताइन् ।
प्रधानमन्त्री कार्कीले सरकारले शान्ति, सुरक्षा र सुव्यवस्था कायम गर्दै भयरहित वातावरणमा निर्वाचन सम्पन्न गर्न कुनै कसर बाँकी नराख्ने बताइन् ।
प्रकाशित मिति: १५ पुस २०८२, मंगलबार
