उपाध्यक्ष पौडेलको पक्राउ राजनीतिक प्रतिशोध र षड्यन्त्र : अध्यक्ष ओली
काठमाडौँ, ८ असार । नेकपा (एमाले)का अध्यक्ष केपी शर्मा ओलीले पार्टी उपाध्यक्ष विष्णु पौडेलको पक्राउलाई राजनीतिक प्रतिशोध र शृङ्खलाबद्ध षड्यन्त्रको संज्ञा दिएका छन् ।
सरकारले प्रतिशोध साध्न खोजेको आरोप लगाउँदै अध्यक्ष ओलीले सरकारका दमनकारी कदमको डटेर सामना गर्ने बताएका छन् ।
“वर्तमान सत्तापक्षले विपक्षी दलहरूप्रति अख्तियार गरिरहेको अराजनीतिक, अलोकतान्त्रिक र नाङ्गो प्रतिशोधको यो अर्को पराकाष्ठा हो । यो दमनकारी कदम एमालेमाथि लगातार भइरहेका शृङ्खलाबद्ध प्रहार र राजनीतिक षड्यन्त्रको निरन्तरता हो,” ओलीले भनेका छन् ।
अध्यक्ष ओलीले पूर्वनिर्धारित कार्यक्रम हुँदाहुँदै विधिको शासन र सामान्य कानुनी प्रक्रियाको बेवास्ता गर्दै पौडेललाई पक्राउ गरिएको बताएका छन् । उनले सोधपुछका अन्य विकल्प हुँदाहुँदै सरकारले सस्तो लोकप्रियताका लागि यस्तो कदम चालेको आरोप लगाएका छन् ।
“जुनसुकै बेला सोधपुछ गर्न सकिने वा उहाँकै उपस्थितिमा प्रक्रिया अघि बढाउन सकिने विकल्पलाई नियतवश लत्याइएको छ,” ओलीले जारी गरेको विज्ञप्तिमा उल्लेख छ ।
उनले वर्तमान सरकार अलोकतान्त्रिक, सर्वसत्तावादी र अधिनायकवादतर्फ उन्मुख भएको आरोप लगाउँदै विपक्षी दलका नेतामाथिका यस्ता कदम तत्काल रोक्न चेतावनी दिएका छन् ।
“विपक्षी दलका नेताहरूमाथि लक्षित यस्ता निकृष्ट र प्रतिशोधपूर्ण हर्कतहरू तत्काल बन्द गरियोस्,” ओलीले भनेका छन् ।
एमाले उपाध्यक्ष पौडेललाई सोमबार पार्टीको आन्तरिक चुनावी समीक्षा तथा संगठन पुनर्गठनसम्बन्धी कार्यक्रममा सहभागी भइरहेका बेला सुर्खेतको वीरेन्द्रनगरबाट पक्राउ गरिएको थियो ।
प्रकाशित मिति: ८ असार २०८३, सोमबार
