डडेल्धुरामा स्कारपियो दुर्घटना हुँदा निर्वाचन अधिकृतसहित पाँच जना घाइते

डडेल्धुरा । डडेल्धुरामा स्कारपियो दुर्घटना हुँदा पाँच जना घाइते भएका छन्।

जिल्लाको अमरगढी नगरपालिका- ११ रडुवा खोला स्थित के आई सिंह राजमार्गमा निर्वाचन कार्यालय डोटीका कर्मचारी चढेको गाडी दुर्घटना हुँदा पाँच जना घाइते हुन् ।

घाइते हुनेमा अजयमेरु गाउँपालिका- ६ घर भइ डोटीका निर्वाचन अधिकृत रहेका ४२ वर्षीय करुणाकर पन्त, बर्दिया घर भइ सशस्त्र प्रहरी बल ३६ नं. गण डोटीमा कार्यरत ४० वर्षीय सुमन चौधरी रहेका छन् ।

त्यसैगरी तनहुँ भानु नगरपालि घर भइ नेपाली सेना भैरवनाथ गण डोटीमा कार्यरत ३८ वर्षीय सुर्यबहादुर कोइराला, गन्यापधुरा गाउँपालिका–३ का ३० वर्षीय मिनबहादुर बोहरा र डोटीको दिपायल सिलगढी नगरपालिका ५ का ४५ वर्षीय चालक तेजबहादुर अधिकारी रहेका छन्।

डडेल्धुराबाट दिपायल तर्फ जाँदै गरेको स्कार्पियो अनियन्त्रित भई सडक छेउमा ठोक्किँदा दुर्घटना भएको प्रहरीले जनाएको छ। घाइते सबैको अवस्था सामान्य रहेको प्रहरीले जनाएको छ।