परराष्ट्रमन्त्री बालानन्द शर्मा आज बंगलादेश जाँदै

काठमाडौं । बंगलादेशको प्रधानमन्त्रीको सपथ ग्रहण समारोहमा भाग लिन परराष्ट्रमन्त्री बालानन्द शर्मा आज ढाका जाँदैछन्।

बंगलादेशमा फरबरी १२मा भएको आम निर्वाचनमा बंगलादेश नेसनलिस्ट पार्टी (बीएनपी) का तारिक रहमानले भोलि प्रधानमन्त्री पदको सपथ लिँदैछन्।

बीएनपीले रहमानलाई संसदीय दलको नेतामा चयन गर्दै प्रधानमन्त्रीमा नियुक्त गर्नेछ। रहमान पूर्वप्रधानमन्त्री खालिजा जियाका छोरा हुन्। उनको पार्टीलेदुई तिहाइ मत पाएको छ।

सपथ ग्रहणमा भाग लिन अन्तरिम सरकारका मुख्य सल्लाहकार मोहम्मद युनुसले नेपालसहित चीन, साउदी अरेबिया, भारत, पाकिस्तान, टर्की, यूएई, कतार, मलेसिया, ब्रुनेई, श्रीलंका, माल्दिभ्स र भुटानका सरकार प्रमुखलाई सपथ ग्रहण समारोहमा निमन्त्रणा पठाएका थिए।

त्यसैले छिमेकी मित्रराष्ट्र बंगलादेशमा आएको राजनीतिक परिवर्तन र नयाँ सरकारको गठनसँगै हुन लागेको सपथ समारोहमा नेपालको तर्फबाट प्रतिनिधित्व गर्न मन्त्री शर्मा त्यसतर्फ जान लागेका हुन् ।

भ्रमणका क्रममा परराष्ट्रमन्त्री शर्माले बंगलादेशी समकक्षी तथा अन्य उच्च अधिकारीहरूसँग भेटघाट गर्ने सम्भावना समेत रहेको छ।

उक्त भ्रमणले नेपाल र बंगलादेशबीचको कुटनीतिक सम्बन्ध, ऊर्जा व्यापार र क्षेत्रीय सहयोगका मुद्दाहरूलाई थप मजबुत बनाउने अपेक्षा गरिएको छ।