सर्लाहीमा पेस्तोल पड्किँदा १५ वर्षीय बालक घाइते
सर्लाही । सर्लाहीमा पेस्तोल पड्किँदा एक बालक घाइते भएका छन् ।
जिल्लाको मलंगवा नगरपालिका–४ को ढाँका बोर्डर टोलमा बिहीबार दिउँसो पेस्तोल पड्किँदा १५ वर्षीय आकाश राम घाइते भएका हुन् ।
आकाशले घर नजिकै निर्माणाधीन हनुमान मन्दिरभित्र परिसरमा खेलिरहेको बेला कपडाले बेरिएको अवस्थामा पेस्तोल फेला पारेका थिए ।
नक्कली ठानेर चलाउने क्रममा पेस्तोल अचानक पड्किँदा गोली आकाशको दाहिने हातमा लागेको थियो । त्यसपछि आकाशलाई उपचारका लागि तत्काल प्रादेशिक अस्पताल लगिएको थियो ।
प्रादेशिक अस्पताल मलंगवामा उपचारत आकाशको अवस्था मध्यम रहेको अस्पतालका चिकित्सकले बताएका छन् ।
घटनास्थलबाट एक थान पेस्तोल बरामद गरेको र पेस्तोलमा पड्किएको खोका अड्किएको अवस्थामा भेटिएको जिल्ला प्रहरी कार्यालय सर्लाहीले जनाएको छ । साथै घटनाबारे थप अनुसन्धान भइरहेको बताइएको छ ।
प्रकाशित मिति: ७ फाल्गुन २०८२, बिहिबार
