इन्सास राइफलसहितका हतियार भक्तपुरबाट एक जना पक्राउ

काठमाडौं । भक्तपुरबाट इन्सास राइफल र विभिन्न हातहतियारसहित प्रहरीले एक जनालाई पक्राउ गरेको छ।

मंगलबार बिहान करिब ९ बजे सूर्यविनायक नगरपालिका–८ भुम्डोलबाट ३१ वर्षीय आयन सेढाईलाई प्रहरीले नियन्त्रणमा लएको हो। उनी गोरखाको पालुङटार नगरपालिका–९ स्थायी घर भई हाल भक्तपुरमा बस्दै आएका थिए ।

सेढाईको साथबाट इन्सास राइफलका साथै एसएलआर राइफलका गोली ४ राउण्ड, प्लास्टिक राउण्ड १ थान, सटगनमा लाग्ने राउण्ड १ थान, खुकुरी १ थान, खुकुरीको दाप २ थान, बन्चरो १ थान तथा लागूऔषध प्रयोगमा आउने सिरिन्ज ५ थान बरामद गरिएको जिल्ला प्रहरी कार्यालय भक्तपुरका सूचना अधिकारी प्रहरी नायब उपरीक्षक प्रकाश जबेगुले जानकारी दिए ।

इन्सार हतियार जेनजी आन्दोलनका क्रममा लुटिएको र यसबारे थप अनुसन्धान भइरहेको प्रहरीले जनाएको छ ।