मकवानपुर-२ मा २५ वर्षका उप्रेतीले भत्काए वामपन्थीको किल्ला

मकवानपुर । वामपन्थीको किल्लाको रूपमा परिभाषित मकवानपुर क्षेत्र नम्बर-२ मा रास्वपाका उम्मेदवार विजयी भएका छन् । २०४८ सालदेखि वामपन्थीहरुको किल्लाको रूपमा रहँदै आएको उक्त क्षेत्र भत्काउन सफल भएका छन् रास्वपाका प्रशान्त उप्रेती ।

मकवानपुर २ संसदीय निर्वाचन क्षेत्रमा राक्सिराङ गाउँपालिका, कैलाश गाउँपालिका, इन्द्रसरोवर गाउँपालिका, थाहा नगरपालिका, मनहरी गाउँपालिका, भीमफेदी गाउँपालिका, वडा ५–८ मकवानपुरगढी गाउँपालिका र हेटौँडाको १, ३, ११ र १९ नम्बर वडा रहेका छन् । उक्त क्षेत्रबाट प्रतिनिधि सभाको निर्वाचन होस वा संविधान सभाको निर्वाचन होस वामपन्थीहरुले जीत हासिल गर्दै आएका थिए ।

विशेषगरि सो क्षेत्रमा एमालेका उम्मेदवार विजयी हुँदै आएका थिए । २०४८ देखि हालसम्म एमालेका उम्मेदवारले जित्दै आएको सो क्षेत्रमा २०६४ मा माओवादी उम्मेदवारले चुनाव जितेका थिए ।

२०४८ मा एमालेका विरोध खतिवडाले चुनाव जितेका थिए । २०५१, २०५६ मा पनि एमालेका उम्मेदवार नै विजयी भएका थिए । २०६४ मा मकवानपुर ४ निर्वाचन क्षेत्र हुँदा तत्कालीन मकवानपुर-२ र ४ मा क्रमशः माओवादीका प्रेमबहादुर पुलामी र कुमारी मोक्तानले चुनाव जितेका थिए ।

२०७० मा मकवानपुर-२ र ४ मा एमालेका सुभाषचन्द्र शाही ठकुरी र राजाराम स्याङ्तानले चुनाव जितेका थिए । संघीय संरचना लागु भएपछि २०७४ मा एमालेका विरोध खतिवडा र २०७९ मा एमालेका महेश बर्तौलाले चुनाव जितेका थिए ।