सुकुमबासीलाई थप पीडा नदेउ, बासको सुनिश्चितता गरेर मात्र डोजर चलाऊ : सांसद चौधरी

काठमाडौँ । नेकपा (एमाले) की सांसद पूजा चौधरीले सुकुमबासी बस्तीहरू हटाउनुअघि उनीहरूको वैकल्पिक व्यवस्था गर्न सरकारसँग माग गरेकी छन्।

राष्ट्रिय सभाको बिहीबारको बैठकमा बोल्दै उनले काठमाडौँ उपत्यकाका सुकुमबासीहरूको अवस्था अत्यन्त अव्यवस्थित र कष्टकर रहेको भन्दै सरकारको ध्यानाकर्षण गराएकी हुन्।

सांसद चौधरीले सुकुमबासी बस्ती भत्काउँदा उचित व्यवस्थापन नगरिएका कारण भूमिहीनहरूको खानपान, पिउने पानी र विशेषगरी बालबालिकाको शिक्षा प्रभावित भएको बताइन्। बस्ती हटाइएपछि बालबालिका र अभिभावक छुट्टाछुट्टै स्थानमा बस्न बाध्य भएको र उनीहरू विद्यालय जाने विषय समेत अन्योलमा परेको उनले उल्लेख गरिन्।

बैठकमा बोल्दै उनले भनिन्, ‘सुकुमबासीहरूको अवस्था अस्तव्यस्त छ र न राम्रो खानाको व्यवस्था छ, न पिउने पानीको नै कुनै राम्रो व्यवस्था छ। बालबच्चाहरू कतै बसिराखेका छन् त आमाबुबाहरू कतै। कहिलेदेखि स्कुल जाने भन्ने विषयमा पनि अझै अन्योल छ। म सरकारलाई आग्रह गर्न चाहन्छु, अब भत्काउन बाँकी सुकुमबासीहरूको राम्रो व्यवस्था होस् अनि मात्र भत्काइयोस्।’

उनले सुकुमबासी समस्या हल गर्ने नाममा भूमिहीनहरूलाई थप पीडा नदिन समेत सरकारसँग आग्रह गरेकी छन्। बासको ग्यारेन्टी र आधारभूत आवश्यकताको सुनिश्चितता नगरी बस्तीहरू भत्काउने कार्य न्यायसंगत नहुने उनको तर्क छ।